बुधवार ७ कार्तिक, २०७५ (Wednesday, 24th October 2018)
७ कार्तिक, २०७५ (24 October 2018)

पदक विजेता सम्मानित

राजधानी समाचारदाता
2 weeks ago
12/10/2018

 

काठमाडौं/रास–नेपाल ओकिनावा सुरिकेन सोरिनरियो कराते संघले आफ्ना अन्तर्राष्ट्रिय पदक विजेता खेलाडीलाई बिहीबार नगदसहित सम्मान गरेको छ । सिंगापुर अन्तर्राष्ट्रिय कराते च्याम्पियनसिपका कांस्य विजेताद्वय आर्यन रन्जित र सागर शाही तथा थाइल्यान्ड ओपन कराते च्याम्पियनसिपकी रजत विजेता कृति गौतम र कांस्य विजेता डिगम्बरप्रसाद पन्तलाई सम्मान गरिएको हो ।

पाँचै जनालाई संघका उपाध्यक्ष रोशन विष्टले जनही ५ हजार नगद प्रदान गरे । पाँचै पदक विजेतालाई संघका सल्लाहकार एवं नेपाल भारोत्तोलन संघका उपाध्यक्ष रामकृष्ण श्रेष्ठले ७ हजार मुल्य बराबरको ब्याग पनि प्रोत्साहन स्वरुप प्रदान गरेका थिए । ८ वर्षिय आर्यनलाई संघका उपाध्यक्ष किशनराज सिंहले नगद २० हजार प्रदान गरे । संघका सदस्य अच्यूत लामिछानेले पनि प्रोत्साहन स्वरुप आर्यनलाई ५ हजार नगदबाट पुरस्कृत गरे ।

राष्ट्रिय खेलकुद परिषद्का सदस्य–सचिव केशवकुमार विष्ट, संघका अध्यक्ष सञ्जय रन्जितलगायतले उनीहरुलाई सम्मान गरेका थिए । सोही अवसरमा नेपाल रेफ्री काउन्सिलका संयोजक राजेन्द्र कपाली र सह–संयोजक महेश रन्जित तथा सल्लाहकार रामकृष्ण श्रेष्ठलाई पनि सम्मान गरिएको थियो ।