बुधवार ९ माघ, २०७५ (Wednesday, 23rd January 2019)
९ माघ, २०७५ (23 January 2019)

भूत मेलामा दर्शनार्थीको सुन लुटियो

रासस
3 months ago
18/10/2018

गौशाला, १ कात्तिक ।  भूत मेलाका लागि प्रख्यात महोत्तरी जिल्लाको सोनामाई मन्दिरमा एक दर्जन दर्शनार्थीको सुन लुटिएको छ ।जिल्लाको औरही नगरपालिका–७ मा पर्ने सोनामाई मन्दिरमा दर्शन गर्ने क्रममा आज मात्रै सातजना महिलाको सुन लुटिएको स्थानीयवासी सुरेश ठाकुरले बताउनुभयो ।

आज सोनामाई मन्दिरमा दर्शन गर्ने क्रममा औरही–७ कै शिवशङ्कर ठाकुरकी पत्नी उमादेवी ठाकुरको दुई तोलाको सुनको सिक्री लुटिएको छ भने सोही वडाका वडाध्यक्ष गणेश यादवकी बहिनीको पनि मङ्गलसुत्र लुटिएको छ । त्यस्तै आजै अन्य पाँचको गरी जम्मा सातजनाको सुनको सिक्री र मङ्गलसुत्र लुटिएको जनाइएको छ ।

त्यसैगरी सोनामाई मन्दिरमा बुधबार पनि दर्शन गर्ने क्रममा पाँचजनाको सुनका गरगहना लुटिएको स्थानीयवासी सुरेश ठाकुरले बताउनुभयो । उहाँले नेपालीसहित केही भारतीय दर्शनार्थीको पनि सुनका गरगहना लुटिएको बताउनुभयो । महिलाको मात्रै गलामा रहेका सुनका सिक्री र मङ्गलसुत्र लुटिएको छ भने यसै क्रममा मङ्गलसुत्र लुटिएको एक भारतीय महिला मन्दिर परिसरमै निकै रोइरहेको भेटिएको छ ।

देवी मन्दिरमा दर्शनका क्रममा दुई दिनमा एक दर्जन व्यक्तिको सुन लुटिएको सम्बन्धमा जिल्ला प्रहरी कार्यालय महोत्तरीका प्रमुख तथा प्रहरी उपरीक्षक ईश्वर कार्कीसँग सोध्दा उहाँले आफूलाई यस सम्बन्धमा कसैले केही जानकारी नगराएको बताउनुभयो ।

मन्दिरमा आज भीडभाडका बीच सातजनाको सुन लुटिएपछि ठूलो हल्लाखल्ला भएपछि सुन लुट्नेमध्येका एकजनालाई स्थानीयवासीले पक्राउ गरेका छन् भने उनको नाम गोप्य राखिनाका साथै प्रहरीको जिम्मा पनि नलगाएको स्थानीयवासी ठाकुरले आरोप लगाउनुभयो ।

दुई दिनमा एक दर्जन व्यक्तिको सुन लुटिएको सोनामाई मन्दिरमा प्रहरीको उपस्थित रहँदा पनि प्रहरीले केही गर्न नसकेको सर्वसाधारण र मेला भर्न आएका नेपाली तथा भारतीय दर्शनार्थीले गुनासो गरेका छन् ।

(Visited 6 times, 1 visits today)