06/12/2018

काठमाडौं। अञ्जन विष्टको एकमात्र गोलमा सिग्नेचर मनाङ–मस्र्याङ्दी क्लबले ग्रान्डमास्टर जावलाखेल युथ क्लबमाथि १–० को कठिन जित निकालेको दिन रुस्लान थ्री स्टार क्लबले सरस्वती युथ क्लबमाथि २–१ को प्रतिस्पर्धात्मक जित निकालेको छ ।

यससँगै मनाङ शीर्षतर्फ अघि बढ्दा थ्री स्टारले मनाङलाई पछ्याइरहेको छ । मनाङ ६ खेलबाट शतप्रतिशत नतिजासहित १८ अंक जोडेर शीर्ष स्थानमा रहँदा समान ६ खेलबाटै एक खेलमा हार बेहोरेको थ्री स्टार १५ अंक जोडेर लिगको दोस्रो स्थानमा रहेको छ । थ्री स्टार मनाङसँग २–१ ले पराजित भएको थियो । त्यसयता थ्री स्टारले शतप्रतिशत जित निकालिरहेको छ ।

सातदोबाटोस्थित एन्फा कम्प्लेक्सको खेल मैदानमा बुधबार भएको खेलमा मनाङले जावलाखेलमाथि दबाब सिर्जना गरे पनि गोलका लागि दोस्रो हाफ नै कुर्नुपरेको थियो । पहिलो हाफमा मनाङले लगातार आक्रमण बुने पनि जावलाखेलका गोलरक्षक टकेन्द्र थापा लगातार बाधक बने । सातौं मिनेटमा कप्तान विशाल राईको फ्रिकिकमा गोलरक्षक टकेन्द्रले पन्च गरेको बलमा अञ्जनको प्रहार पुनः उनले बचाए । एडिलाजा सोमिडेको प्रहारलाई पनि उनले विफल पारे ।

१५औं मिनेटमा विशाल राईले करिब ३० यार्ड टाढाबाट प्रहार गरेको फ्रिकिक टकेन्द्रको हातमा लाग्दै क्रसबारमा लागेर फर्किंदा मनाङले खेलमा अग्रता बनाउने सुन्दर मौका खेर फाल्यो । ६२औं मिनेटमा मनाङले पेनाल्टीमार्फत खेलमा अग्रता बनायो ।

डिफेन्डर अडामा डुम्बियाले ओलावाले आफिजलाई पेनाल्टी बक्समा लडाएपछि रेफ्री कविन व्यञ्जनकारले मनाङलाई पेनाल्टी दिए, जसमा अञ्जन विष्ट चुकेनन् । यससँगै अञ्जनले लिगमा आफ्नो गोल संख्या ५ पु¥याएका छन् । ८२औं मिनेटमा कमल श्रेष्ठको क्रसमा ओलावाले आफिजले खाली पोस्टमा गरेको डाइभिङ फ्री हेडरलले पोस्टको दिशा दिन सकेनन् ।

लगत्तै आफिजको पासमा अञ्जनको प्रहार पनि बाहिरियो । इन्ज्युरी समयको तेस्रो मिनेटमा जावलाखेलले बराबरी गर्ने सुन्दर मौका खेर फाल्यो । सुशील यादवको हेडरलाई मनाङका गोलरक्षक विशाल श्रेष्ठले उत्कृष्ट बचाउ गरे । रिबाउन्ड बलमा जावलाखेलका अरुज सिंहले बललाई पोस्टको दिशामा प्रहार गर्न सकेनन् ।

इन्ज्युरी समयको आठौं मिनेटमा जावलाखेलका लावल ओलाकनले २५ यार्ड टाढाबाट प्रहार गरेको फ्रिकिक वैकल्पिक गोलरक्षक अशोक बराललाई लाग्दै पोस्टको दिशाबाट बाहिरिँदा जावलाखेलले बराबरी गर्ने मौका गुमायो । मनाङका अञ्जन विष्ट खेलको म्यान अफ दी म्याच घोषित हुँदै १० हजार पुरस्कार पाए ।

च्यासलको दोस्रो जित

भ्याली च्यासल युथ क्लबले राजधानीमा जारी पल्सर शहीद स्मारक ‘ए’ डिभिजन लिग फुटबलमा दोस्रो जित निकालेको छ ।प्रतिस्पर्धात्मक खेलमा च्यासलले हिमालयन शेर्पा क्लबलाई २–१ ले पराजित गर्दै लिगमा दोस्रो जित निकाल्न सफल भएको हो । च्यासलले यसअघि लिगको तेस्रो चरणको खेलमा न्युरोड टिम (एनआरटी) माथि ५–१ को प्रभावशाली जित निकालेको थियो ।

सातदोबाटोस्थित एन्फा कम्प्लेक्सको खेल मैदानमा बुधबार भएको प्रतिस्पर्धात्मक खेलमा च्यासलले १ गोलले पछि परेको स्थिति उल्ट्याएर जित निकालेको हो । च्यासलका लागि सन्तोष साहुखलले गोल गर्दा १ गोल उपहार पाएको थियो । हिमालयन शेर्पाका त्रिदेव गुरुङले गोल गरेका थिए ।

१५औं मिनेटमा च्यासलका खेलाडीले अफसाइड भनेर छोडेको बलमा कर्ण लिम्बुले वान भर्सेस वानमा प्रहार गरेको बल बारमा लाग्दै फर्किएपछि त्रिदेव गुरुङले गोल गर्दै शेर्पालाई सुरुवाती अग्रता दिलाएका थिए । त्यसअघि खेलको पहिलो मिनेटमै सन्तोष साहुखलको पेनाल्टी क्षेत्रभित्रको प्रहारलाई शेर्पाका गोलरक्षकले बचाएका थिए । १३औं मिनेटमा सन्तोष साहुखलकै पासमा अनमार्क रहेका सन्तबहादुर गुरुङको प्रहार अकासिदा च्यासलले अग्रता लिने मौका खेर फाल्यो । ३०औं मिनेटमा हेमन्त थापा मगरको करिब ३० यार्ड टाढाको प्रहार बारमा लागेर बाहिरिँदा च्यासलले बराबरीको मौका गुमायो । ४०औं मिनेटमा आमिर श्रेष्ठको पासमा सन्तोषको हेडर गोलरक्षकले बचाउँदा च्यासल पहिलो हाफमा १–० ले पछि परेको थियो ।

दोस्रो हाफमा च्यासलले खेललाई आफ्नो नियन्त्रणमा लिँदै गोल गर्न सफल भयो । ५०औं मिनेटमा रवि थापाको पासमा कर्णको हेडर बाहिरिँदा शेर्पाले अग्रता दोब्बर पार्ने मौका खेर फाल्यो । लगत्तै ५१औं मिनेटमा आमिर श्रेष्ठको शक्तिशाली प्रहार पोस्टबाट थोरै बाहिरियो । बारम्बार मौका खेर फालिरहेको च्यासलले ५६औं मिनेटमा बराबरी गोल गर्न सफल भयो । सन्तोष साहुखलले दुई डिफेन्डरलाई बिट गर्दै गोलरक्षकलाई छक्याउँदै सुन्दर गोल गरेका थिए । ७३औं मिनेटमा च्यासलले खेलमा अग्रता बनायो ।

सन्तोषकै प्रहार डिफेन्डर निरज बस्नेतलाई लाग्दै फर्किएको बलमा वैकल्पिक खेलाडी सुनिल खड्काले प्रहार गरेको बल फेरि निरजलाई लाग्दै गोलमा परिणत हुँदा शेर्पाका गोलरक्षक किशोर गिरी मूकदर्शक बनेका थिए । त्यसपछि थप गोल निस्कन नसक्दा च्यासल २–१ ले विजयी हुन सफल भयो । च्यासलका सन्तोष साहुखल खेलको म्यान अफ दी म्याच घोषित भए । उनले १० हजार रुपैयाँ पुरस्कार पाए ।

जितपछि च्यासल ७ अंक जोडेर लिगको सातौं स्थानमा उक्लिएको छ । च्यासलले ६ खेलमा २ जित १ बराबरी र ३ हार बेहोरेको छ । पराजित शेर्पा समान ६ खेलबाटै १० अंक जोडेर छैटौं स्थानमा छ ।

जितपछि च्यासलका प्रशिक्षक राजुकाजी शाक्यले टिमले सुधारिएको खेल पस्कँदा खेलमा पछि परेर पनि जित हात पार्न सकिएको बताए । ‘हामीले यसअघि लिगको उपाधि जित्ने लक्ष्य बनाएका थियौं तर राम्रा विदेशी खेलाडी टिममा ल्याउन समस्या हुँदा राम्रो सुरुवात हुन सकेन । अब हामीले टप सिक्समा रहने योजना बनाएका छौं । शेर्पासँग हार बेहोरेको भए हामीलाई आफ्नो लक्ष्य भेट्टाउन अझै गाह्रो हुने थियो,’ खेलपछि प्रशिक्षक राजुकाजी शाक्यले भने, ‘यो जितले हामीले लिएको लक्ष्य भेट्टाउन सहज हुने अपेक्षा छ । लिगमा अझै सात खेल बाँकी छ ।

हामी राम्रो नतिजा निकाल्ने लक्ष्यमा हुनेछौं ।’ शेर्पाका प्रशिक्षक सुवास लिम्बुले लगातार खेलिरहनुपर्दा खेलाडीले विश्राम नपाएकाले नतिजा आफ्नो पक्षमा पार्न नसकिएको बताए । ‘दुवै टोली बराबरकै हो, उनीहरूले पाएका मौकालाई सदुपयोग गरे, हामी त्यसमा चुक्यौं,’ खेलपछि प्रशिक्षक लिम्बुले भने, ‘अब पुलिस र संकटाजस्तो बलियो टोलीसँग लगातार खेल्ने तालिका छ, विश्राम नपाउँदा लिगमा अब झन् गाह्रो हुने पक्का छ ।’