आइतवार १२ जेठ, २०७६ (Sunday, 26th May 2019)
१२ जेठ, २०७६ (26 May 2019)

प्राथमिकता क्षेत्रमा ऋण लगानी न्यून

राजधानी समाचारदाता
3 months ago
22/02/2019

 

काठमाडौं। प्राथामिकता क्षेत्रमा वाणिज्य बैंकको कुल कर्जाको २५ प्रतिशत कृषि, पर्यटन र ऊर्जा क्षेत्रमा लगानी गर्नुपर्ने भए पनि त्योभन्दा न्यून मात्रै लगानी भएको छ । नेपाल राष्ट्र बैंकले हालै सार्वजनिक गरेको चालू आवको मौद्रिक नीतिको अर्धवार्षिक समीक्षामा ६ महिने अवधिमा १८ दशमलव ५४ प्रतिशत मात्रै लगानी गरेको देखिएको हो ।

अर्धवार्षिक समीक्षामा कृषि क्षेत्रमा कुल कर्जाको न्यूनतम १० प्रतिशत लगानी गर्नुपर्नेमा ९ दशमलव ९३ प्रतिशत लगानी गरेको पाइए पनि अन्य क्षेत्रमा भने तोकेअनुसार लगानी नभएको पाइएको छ ।

केन्द्रीय बैंकले प्राथमिकता प्राप्त क्षेत्र कर्जाका रूपमा ऊर्जा र पर्यटनमा न्यूनतम १५ प्रतिशत लगानी गर्नुपर्ने व्यवस्था गरेको छ । तर, वाणिज्य बैंकले ऊर्जामा ४ दशमलव २१ प्रतिशत र पर्यटनमा ४ दशमलव ४० प्रतिशत मात्रै लगानी गरेका छन् । अझै बैंकले ६ दशमलव ३९ प्रतिशत कर्जा उपलब्ध गराउनुपर्ने अवस्था रहेको छ ।

सरकारले आत्मनिर्भर अर्थतन्त्रको विकास र विस्तार गर्ने, रोजगारीको प्रवद्र्धन गर्ने लक्ष्यका साथ प्राथमिकता प्राप्त क्षेत्रमा कर्जा दिने व्यवस्था गरेको छ ।

सन् २०२० लाई नेपाल भ्रमण वर्ष घोषणा गरेको र २० लाख पर्यटक भिœयाउने लक्ष्य राखेको सन्दर्भमा पर्यटन क्षेत्रमा समेत उल्लेख्य लगानी हुन नसकेको राष्ट्र बैंकको उक्त विवरणले देखाएको छ । त्यस्तै, आगामी १० वर्षमा १५ हजार मेगावाट विद्युत् उत्पादन गर्ने लक्ष्य राखेको सन्दर्भमा पनि ऊर्जा क्षेत्रमा वाणिज्य बैंकले उल्लेख्य मात्रामा लगानी गर्नुपर्ने भए पनि तथ्यांकले भने त्यस्तो अवस्था नभएको देखाएको छ ।

बैंक तथा वित्तीय संस्थाले जलविद्युत् आयोजनाका प्रवद्र्धकसँग वित्तीय सम्झौता गर्न छाडेको भन्दै निजी क्षेत्रको स्वतन्त्र ऊर्जा उत्पादकको संस्था नेपाल (इपान)ले गुनासो गरेको छ । इपानका अध्यक्ष शैलेन्द्र गुरागाईंले विद्युत् खरिद सम्झौता सम्पन्न भएका तीन दर्जन बढी आयोजनाका प्रवद्र्धकसँग वित्तीय व्यवस्थापनसम्बन्धी सम्झौता हुन नसकेको बताए ।

वित्तीय सम्झौता भएका आयोजनमा समेत बैंक तथा वित्तीय संस्थाले रकम उपलब्ध नगराएको र पटक–पटक ब्याजदरमा वृद्धि गरेका कारण प्रवद्र्धक समस्यामा परेको इपानको गुनासो छ ।

प्राथमिकता प्राप्त क्षेत्रमा तोकिएबमोजिम कर्जा लगानी नभए पनि चालू आवको ६ महिनामा १८ अर्ब ६१ करोड बराबरको सहुलियतपूर्ण कर्जा भने लगानी भएको छ । सरकारबाट ५ प्रतिशत ब्याज अनुदानमा प्रवाह गरिने कृषि तथा पशुपक्षी व्यवसाय कर्जा लिनेको संख्या १० हजार ४८४ ऋणी रहेका छन् ।

उनीहरूले ८८ करोड ७७ लाख बराबरको ब्याज अनुदानसमेत प्रदान गरिएको राष्ट्र बैंकले जनाएको छ । त्यस्तै, विपन्न वर्ग कर्जातर्फ चालू आवको ६ महिनामा १ खर्ब ६१ अर्ब ३६ करोडबराबरको लगानी भएको छ । वाणिज्य बैंक, विकास बैंक र वित्त कम्पनीले आफ्नो कुल कर्जा लगानीको न्यूनतम ५ प्रतिशत विपन्न वर्गमा लगानी गर्नुपर्ने व्यवस्था रहेको छ । कुल कर्जाको ५ दशमलव ९ प्रतिशत सो क्षेत्रमा लगानी भएको छ ।

त्यस्तै, गत पुस मसान्तसम्म २ अर्ब ६५ करोडबराबरको लगानी भूकम्पपीडित कर्जा उपलब्ध भएको छ । १ हजार ५५८ जनाले त्यस्तो कर्जा लिएको बैंकको विवरणमा उल्लेख छ ।

 

(Visited 42 times, 1 visits today)
Loading comments...