बुधवार ४ भाद्र, २०७६ (Wednesday, 21st August 2019)
४ भाद्र, २०७६ (21 August 2019)

अनेरास्ववियुले चन्दा नलिने

राजधानी समाचारदाता
1 month ago
20/07/2019

काठमाडौं।नेपाल कम्युनिस्ट पार्टी (नेकपा) निकटको विद्यार्थी संगठन अनेरास्ववियुले अबदेखि कसैसँग पनि चन्दा नलिने निर्णय गरेको छ ।  अनेरास्ववियु केन्द्रीय कमिटी बैठकको निर्णय सार्वजनिक गर्दै संयोजक ऐन महरले संगठन सञ्चालन गर्न संस्थागत र व्यक्तिगत रूपमा निजी शैक्षिक संस्था तथा विश्वविद्यालयबाट कुनै आर्थिक सहयोग नलिने बताए । ‘अब अनेरास्ववियूले संस्थागत र व्यक्तिगत रूपमा निजी शैक्षिक संस्था तथा विश्वविद्यालयबाट कुनै पनि आर्थिक सहयोग लिन बन्द गरेको छ’, उनले भने,
‘मातहत कमिटी र नेता कार्यकर्तालगायत कसैले त्यस्तो आर्थिक सहयोग लिएको पाइएमा अनुशासनको कारबाहीको भागीदार बनाइनेछ ।’ उनले सांस्कृतिक र रचनात्मक कार्यक्रम गर्दा मात्र आर्थिक सहयोग लिने बताए । संयोजक महरले संगठनका नेता तथा कार्यकताबाट ‘लेबी’ उठाई संगठन सञ्चालन गरिने बताए । ‘संगठन एक भएपछि ५० हजार सदस्य संगठनको कमिटीमा आबद्ध छौं, उनले, ‘कमिटी सदस्यबाट लेबी उठाउँछौं ।’
बैठकले विश्वविद्यालयको प्राध्यापकको नियुक्ति गर्न सबै विश्वविद्यालयको एक छाता सेवा आयोग बनाउन तथा करार र आंशिक प्राध्यापकको व्यवस्थापनका लागि नियमित सेवा आयोगको परीक्षा सञ्चालनको माग गरेको छ । साथै प्रतिस्पर्धाबाहेक अन्य प्रावधानबाट प्राध्यापक नियुक्ति नगर्न आग्रह गरेको छ ।
यस्तै, विभिन्न विश्वविद्यालयमा पदाधिकारीदेखि क्याम्पस प्रमुखको खुला प्रतिस्पर्धाको व्यवस्था गर्न माग गरिएको छ । यसैगरी संयोजक महरले त्रिविमा गोल्डमेडलको लागि अंक थप्ने काममा संलग्न जो कोहीलाई कारबाही गर्न माग गर्ने निर्णय गरेको जानकारी दिए ।

बैठकले सरकार र अन्य सम्बद्ध निकायले तोकेको मापदण्ड अवज्ञा गर्दै कक्षा ११ र १२ मा आफूखुसी शुल्क बढाउने शिक्षालयलाई तत्काल कारबाहीको दायरामा ल्याउन पहल गर्ने निर्णय पनि गरेको छ ।
छात्रवृत्ति प्रदान गरेको विवरण सम्बन्धित स्थानीय तह र विद्यालयले आफ्नो विद्यालयको सूचना पाटी र वेबसाइटमा पारदर्शी ढंगले राख्नुपर्ने तथा अनुगमनमा स्थानीय तहले विद्यार्थी संगठनको प्रतिनिधि अनिवार्य गर्नुपर्ने, त्रिविले प्रवीणता प्रमाणपत्र तह ‘फेज आउट’ गर्दा विद्यार्थी संगठनसँग गरिएको सम्झौता कार्यान्वयनमा लैजान दबाबमूलक कार्यक्रम सञ्चालन गर्ने बैठकले निर्णय गरेको छ ।
साथै बाढीपहिरो, भूकम्प र हावाहुरीजस्ता प्राकृतिक प्रकोपमा परी अभिभावक गुमाएका विद्यार्थीलाई विद्यालय शिक्षामा उचित छात्रवृत्तिको व्यवस्था गर्न सरकारसँग माग गरिएको छ । बैठकले सबै स्थानीय तहमा शैक्षिक परामर्श केन्द्रको स्थापना गरी परामर्श प्रदान गर्न माग गरेको छ ।

(Visited 27 times, 1 visits today)
Loading comments...