जुडो टोली हङकङ र मकाउ जाने

राजधानी समाचारदाता/काठमाडौं।

दुई छुट्टाछुट्टै अन्तर्राष्ट्रिय जुडो प्रतियोगितामा सहभागी हुन १ खेलाडीसहित २ सदस्यीय नेपाली जुडो टोली हङकङ र मकाउ प्रस्थान गर्ने भएको छ । टोली पहिले हङकङमा जुलाई १४ र १५ तारिखमा हुने एसियन कप क्याडेट तथा जुनियर जुडो प्रतियोगितामा सहभागी हुनेछ । सोनिया भट्टले क्याडेटतर्फ महिला ४४ केजीमुनि प्रतिस्पर्धा गर्नेछिन् । त्यसपछि सोनियाले मकाउमा जुलाई २० देखि २२ तारिखसम्म हुने सोही नाम गरेको प्रतियोगितामा भाग लिनेछिन् । दुवै प्रतियोगितामा सुनिता मगर ताम्राकारले प्रशिक्षकको भूमिका निर्वाह गर्नेछिन् ।

टोलीलाई सांसद् एवं नेपाल ओलम्पिक कमिटीका अध्यक्ष जीवनराम श्रेष्ठ र नेपाल जुडो संघका अध्यक्ष दीपकहर्ष बज्राचार्यले एक कार्यक्रमबीच बुधबार बिदाइ गरे । अध्यक्ष श्रेष्ठले अक्टोबरमा अर्जेन्टिनामा हुने युथ ओलम्पिकको तयारीलाई मध्यनजर गरी ओलम्पिक कमिटीले खेलाडीलाई प्रतियोगितामा सहभागी गराउन लागेको जानकारी गराए । सोनिया युथ ओलम्पिकका लागि छनोट भएकी खेलाडी हुन् । टोली बिहीबार प्रस्थान गर्नेछ ।