२२ तलाको धरहरा बन्ने

राजधानी समाचारदाता, काठमाडौं । भूकम्पले क्षतिग्रस्त बनाएको धरधरा पुर्निर्माणको बाटो खुलेको छ । धरहरा निर्माणका लागि राष्ट्रिय पुनर्निर्माण प्राधिकरणले बोलपत्र आह्वान गरेकोमा आईतबार ठेक्काको आर्थिक प्रस्ताव खोलेको छ ।

आर्थिक प्रस्तावमा जिआइइटिसी–रमन सबैभन्दा कम रकम कबोल गर्ने कम्पनी रहेको प्राधिकरणले जनाएको छ । अब धरहरा निर्माणको ठेक्का उसैले पाउनेछ । धरहरा पुनर्निर्माणका लागि ७ कम्पनीले आवेदन दिएकोमा आशिष कन्ट्रक्सन प्राविधिक मुल्याकंनबाटै बाहिरिएको थियो ।

जिआइइटिसी–रमनबाहेक धरहरा पुनर्निर्माणका लागि सिआइसिओ–कालिका–रसुवा जेभीले ४ अर्ब ३९ करोड, जेडआइइसी–लामा जेभीले ४ अर्ब ५० करोड, सिआरफाइभसिइसी–स्वच्छन्द जेभीले ४ अर्ब ५२ करोड र कुमार सिएफइसीले ४ अर्ब ४९ करोडको प्रस्ताव गरेका थिए । प्राधिकरणका सहसचिव राजुमान मानन्धरका अनुसार सबैभन्दा कम ठेक्का प्रस्ताव गर्ने जीआईईटिसी–रमन जेभीको आर्थिक प्रस्तावको अध्ययन भइरहेको छ ।

मानन्धरले आशयपत्रका लागि सात दिने समय दिई त्यसको दुई हप्तामा सम्झौता हुने बताए । प्राधिकरणले धरहरा पुनर्निर्माणका लागि बैशाख ३१ गते टेन्डर आह्वान गरेको थियो । यसअघि धरहरा पुनर्निर्माण गर्ने जिम्मा नेपाल टेलिकमले लिएको थियो । तर डिजाइन टुंग्याउन नसकेपछि प्राधिकरण आँफैले निर्माण गर्ने निर्णय गरेको थियो । अब बाहिरबाट हेर्दा ११ तलादेखिने गरी २२ तले धरहरा निर्माण हुनेछ ।