करेन्ट लागेर किशोरको मृत्यु

राजधानी समाचारदाता, तुलसीपुर । दाङको तुलसीपुरमा करेन्ट लागेर एक किशोरको मृत्यु भएको छ । मृत्यु हुनेमा तुलसीपुर उपमहानगरपालिका वडा नं.८ कट्कुईयाँ निवासी १८ बर्षका कपिल डाँगी रहेको इलाका प्रहरी कार्यालय तुलसीपुरका प्रहरी नायब उपरीक्षक प्रकाश सापकोटाले जानकारी दिए ।

छिमेकीको गोठ सफा गर्नका लागि बुधबार विहान नौ बजे कुवाबाट पानी तान्ने मोटर जडान गर्दा डाँगीलाई करेन्ट लागेको थियो । करेन्ट लागेर गम्भिर घाइते भएका डाँगीलाई उपचारका लागि राप्ती अञ्चल अस्पताल तुलसीपुरमा लग्ने क्रममा बाटोमै मृत्यु भएको ईलाका प्रहरी कार्यालय तुलसीपुरले जानकारी दिएको छ ।