आइतवार १० चैत्र, २०७५ (Sunday, 24th March 2019)
१० चैत्र, २०७५ (24 March 2019)

११५ वर्षीया बाटुली लामिछानेद्वारा मतदान

1 year ago
27/11/2017

जिल्ला ब्युरो / काठमाडौं

आइतबार भएको प्रतिनिधिसभा तथा प्रदेशसभा निर्वाचनमा एक सय वर्ष कटेका वृद्धवृद्धाले पनि मतदान गरेका छन् । उनीहरूले छोराछोरी तथा आफन्तको सहयोगमा मतदान गरेका हुन् । मतदान गर्न पाउँदा उनीहरू अत्यन्तै खुसी देखिन्थे ।

नुवाकोटको ककनी गाउँपालिका–८ की ११५ वर्षीया बाटुली लामिछानेले मतदान गरेकी छन् ।  ककनी गाउँपालिका–८ मात्रागाउँमा रहेको अरुणोदय आधारभूत विद्यालय मतदान केन्द्रबाट लामिछानेले आइतबार अपराह्न मतदान गरेको राजधानी सहकर्मी भभोला पौडेलले जनाएकाछन् ।

उनले छोरा नेत्रप्रसाद लामिछानेको सहयोगमा मतदान गरेको मतदान अधिकृत अर्जुन लामाले जानकारी दिए । लामिछानेले मत दिएपछि मुलुकमा शान्ति, समृद्धि र सबैले सुख पाउने आशा व्यक्त गरिन् ।

नुवाकोटको सूर्यगढी गाउँपालिका–३ का १०१ वर्षका अनन्तप्रसाद अधिकारी पनि आइतबार नै भएको प्रदेशसभा तथा प्रतिनिधिसभा सदस्य निर्वाचनमा सहभागी भए । नाति समुन्द्रबाबुको सहयोगमा बागेश्वरी मावि मतदान केन्द्रबाट उनले मत दिएको मतदान अधिृकत शम्भुप्रसाद चौधरीले जानकारी दिए ।

बैतडीस्थित राजधानी सहकर्मी सीपी लोहियाकाअनुसार बैतडीको सुनर्या गाउँपालिका–८ कठ्मडाकी ११४ वर्षीया वृद्धा पशुपति साउदले मतदान गरेकी छन् । कान्छा छोरा प्रताप साउदले बोकेर ढोल्या मतदान केन्द्रमा पु¥याएपछि वृद्धा साउदले मतदान गरेकी हुन् ।

एकै वर्षमा स्थानीय तह, प्रतिनिधि तथा प्रदेशसभाको निर्वाचनमा मतदान गर्न पाउँदा वृद्धा साउद निकै खुसी देखिन्थिन् । ‘मर्ने बेला भइसकेको हो तर पनि भोट हाल्न पाइराखेकी छु,’ उनले भनिन्, ‘भाग्यमानी रहिछु बाबु अझै भोट हाल्दै छु ’ निर्वाचनमा सहभागी हुन पाउँदा उनले रमाइलो मान्ने गरेको छोरा प्रतापले प्रतिक्रिया दिए ।वृद्धा साउदका चार छोरा छन् । अहिले उनको परिवार २७ जनाको भइसकेको छ । उनका जेठा छोरा हरि साउद ७२ वर्षका छन् भने कान्छा छोरा पनि ५२ वर्षका भइसके ।

आफूले पञ्चायतकालदेखि अहिलेसम्म निरन्तर मतदान गर्दै आएको उनको भनाइ छ । बिहानै मतदान स्थल पुगेकी वृद्धा पशुपतिले आफूले ११४ वर्ष टेक्दासम्म मुलुकमा धेरै परिवर्तन देखिसकेको बताइन् । ‘उहिले बाटोघाटो, सडक, खानेपानी, टेलिफोन, रेडियो, टेलिभिजन केहीको पनि विकास थिएन,’ पछिल्लो समयमा आएको परिवर्तन भोग्न पाएकी उनले हसिलो मुद्रामा भनिन्, ‘अहिले आफंैले मोबाइलमा कुरा गर्न पाएकी छु, मोटर चढ्न पाएकी छु ।’ आफ्नो भोट पाएर जितेका नेताले समाजको विकासको काममा ध्यान दिनुपर्ने उनको भनाइ थियो ।

बैतडीको सुनर्या गाउँपालिका–५ की १०८ वर्षीया नन्दा लुहारले पनि मतदान गरेकी छन् । लुहारले रौलेश्वर माविमा रहेको मतदान केन्द्रबाट मत खसालेको स्थानीय नरेन्द्र विष्टले बताए । सोही मतदान केन्द्रबाट ९४ वर्षका जयबहादुर विष्ट, ८२ वर्षका महावीर विष्टले पनि मतदान गरे । यस्तै, सुनर्या गाउँपालिका–४ मा ९९ वर्षीया मानमतीदेवी चन्दले पनि भोट हालेको स्थानीय प्रकाश भाटले बताए ।

१ लाख ३२ हजार ३ सय १९ मतदाता रहेको बैतडीमा ६० प्रतिशतभन्दा बढी मतदाताले मतदान गरेका छन् । बैतडी जिल्लामा १ सय २० मतदानस्थल तथा १ सय ८२ मतदान केन्द्र कायम गरिएको थियो ।

बाजुराको बडीमालिका नगरपालिका–५ मनाका १०२ वर्षीय रत्न साउदले पनि मतदान गरेका छन् । उनले मनामा रहेको कैलाशेश्वरी मतदान केन्द्रमा मतदान गरेको राजधानी सहकर्मी निमेन्द्र शाहीले जनाएकाछन् । सो मतदान केन्द्रमा बडीमालिका नगरपालिका–५ मनाकै १०१ वर्षीय धने साउदले पनि मताधिकार प्रयोग गरेको धर्म विकले जानकारी दिए । दोलखाको एक मतदान केन्द्रमा मतदानका लागि लाइन बसेकी एक महिलाको हृदयघातका कारण निधन भएको दोलखा प्रशासनले जानकारी दिएको छ ।

(Visited 2 times, 1 visits today)
Loading comments...