शुक्रवार २० मंसिर, २०७६ (Friday, 6th December 2019)
२० मंसिर, २०७६ (6 December 2019)

भवन निर्माण रोक्न अदालतको आदेश

राजधानी संवाददाता
5 months ago
21/07/2019

हेटौंडा।  कृषि तथा वन विज्ञान विश्वविद्यालय चितवनले हेटौंडा–१० मा १० करोडको लागतमा निर्माणाधीन रहेको शैक्षिक भवनको काम नगर्न नगराउन उच्च अदालत पाटन हेटौंडाको इजलासले अन्तरिम आदेश दिएको छ । अदालतका न्यायाधीश चण्डीराज ढकालको एकल इजलासले सो आदेश दिएको हो ।
उक्त विश्वविद्यालयले वन विज्ञान अध्ययन संस्थान (फरेस्ट्री कलेज) को जग्गामा जबर्जस्ती भवन निर्माण गर्न लागेकामा त्यसलाई रोक्न कलेजका प्रमुख विजय यादवले अदालतमा लिखित मुद्दा दायर गरेको थियो ।
वन विज्ञान अध्ययन संस्थान हेटौंडाकोतर्फबाट कृषि तथा वन विज्ञान विश्वविद्यालय केन्द्रीय कार्यालय रामपुर चितवनलाई विपक्षी बनाएर दायर गरिएको रिटमा न्यायाधीश ढकालले विवादित जग्गाको रूख काट्ने तथा सो जग्गामा कुनै पनि संरचना निर्माण गर्नेजस्ता काम नगर्न नगराउन अन्तरिम आदेश जारी गरे ।

निवेदनमा माग गरिएअनुसारको विषयवस्तुमा छलफल गर्न ८ साउनमा दुवै पक्षलाई बोलाइएको छ । सम्पत्ति बाँडफाँटको विषयलाई लिएर लामो समयदेखि विवादका कारण रोकिएको विश्वविद्यालयको नयाँ भवन निर्माण कार्य पछिल्लो समयमा प्रहरी परिचालन गरी भइरहेको थियो । कृषि तथा वनविज्ञान विश्वविद्यालय र त्रिभुवन विश्वविद्यालयबीच जग्गाको विषयलाई लिएर लामो समयदेखि चलिरहेको विवादका बीच शैक्षिक भवनको शिलान्यास भएको थियो ।
मन्त्रिपरिषद् र दुई विश्वविद्यालयको सहमतिविपरीत कृषि विश्वविद्यालयले त्रिविको जग्गा अतिक्रमण गरेर भवन निर्माण सुरु गरेको भन्दै त्रिविले सत्यतथ्य बुझ्नका लागि अध्ययन टोली खटाएको थियो । राजेन्द्र पौडेलको संयोजकत्वमा आएको टोली सदस्यमा प्राडा विनोद पराजुली, प्राध्यापक संघका महासचिव केशवराज शर्मा, कानुनी सल्लाहकार राजेन्द्र खनाल, कर्मचारी संघका वरिष्ठ उपाध्यक्ष पुण्यप्रसाद आचार्य रहेका थिए ।

उक्त टोलीले ऐनविपरीत भवन निर्माण कार्य सुरु भएको र तत्काल रोक्न कृषि तथा वन विश्वविद्यालयलाई आग्रह गर्दासमेत बेवास्ता भएपछि वन विज्ञान अध्ययन संस्थानले अदालतको ढोका ढक्ढक्याउन पुगेको क्याम्पस प्रमुख यादवले बताए ।
हाल उक्त स्थानमा कृषि तथा वन विश्वविद्यालय र त्रिविअन्तर्गत वनविज्ञान संकायको पढाइ भइरहेको छ । धेरै समयदेखि उक्त क्षेत्रमा विद्यार्थी र प्राध्यापकबीच नै विवाद हुने गरेको छ । कृषि तथा वनविज्ञानकोे स्थापनापछि हेटौंडामा वनविज्ञान संकायको डीन कार्यालय स्थापित छ ।

(Visited 36 times, 1 visits today)
Loading comments...