मुम्बई । भूमि, पद्यावत, दासदेव जस्ता थुप्रै चर्चित बलिउड चलचित्रकी अभिनेत्री अदिति राव हैदरीले दक्षिण भारतीय अभिनेता सिद्धार्थसँग विवाह गरेका छन् । केही दक्षिण भारतीय चलचित्रमा काम गरेपछि आमिर खानको चलचित्र धोवीघाटबाट यी अभिनेत्री बलिउडमा प्रवेश गरेकी थिईन् । पुन दक्षिण भारतीय चलचित्रमा काम गर्ने क्रममा उनको सिदार्थसँग निकता बढेको थियो ।
आफुहरुको लामो प्रेम सम्बन्धलाई यी दुईले यतिबेला विवाहबाट औपचारिकता दिएका छन् । यसै वर्ष इँगेजमेन्ट गरेका यी दुईले ४०० वर्ष पुरानो वानपर्थीका मन्दिरमा परिवारका सदस्यहरुबीच विवाह गरेको समाचार आएको छ । दुबैले आफ्नो विवाहको तस्विर सार्वजनिक गर्दै नयाँ अध्याय सुरु गरेको सामाजिक सञ्जालमा उल्लेख गरेका छन् ।
अदिती र सिद्धार्थ दुबैको यो दोश्रो विवाह हो । यी दुईले यस अघि नै विवाह गरेका थिए । तर सिद्धार्थले सन् २००३ मा मेघना नामकी युवतीसँग विवाह गरे तर सन् २००७ मा उनीहरुको सम्बन्धविच्छेद भयो । यसपछि सिद्धार्थको नाम धेरै युवतीहरुसँग जोडियो । तथापि उनको पछिल्लो प्रेमी अभिनेत्री अदितिसँग यतिबेला दोश्रो विवाह भएको हो ।
अभिनेत्री अदितिले पनि चलचित्र यात्रा सुरु गर्नु अघि नै विवाह गरिसकेकी थिइन् । उनको विवाह एकजना वकिलसँग भएको थियो । तर यो दाम्पत्य सम्बन्ध केही समयमै टुटेपछि अभिनेत्री अतिथि राव हैदर मोडलिङ हुँदै दक्षिण भारतीय चलचित्र मार्फत चलचित्र क्षेत्रमा आएकी थिईन् ।
