काठमाडौं । दशैंको छेका परेर नेपाल प्रहरीमा उत्साह जगाउन नयाँ गीत एक कदम…को भिडियो सार्वजनिक गरिएको छ । यस्ता चाड पर्वमा पनि प्रहरी अझधेरै सक्रिय हुनुपर्छ भन्ने सन्देश यो गीतमा समेटिएको छ ।
यो गीतलाई प्रमोद खरेलले गाएका हुन भने विष्णु भण्डारीले लेखेका हुन् । जसमा भिम बिसीको संगीत, श्यामस्वत रसैलीको संगीत संयोजन रहेको छ । गीतमा गायक खरेललाई भिम बिसी, मनोज खनाल, दिनेश बिष्टले स्वरमा साथ दिएका छन् ।
बिक्रम चौहानको निर्देशनमा यो गीतको भिडियो बनेको हो । सार्वजनिक विश्वास र सहयोग, कानुन कार्यान्वयन, अपराध नियन्त्रण र रोकथाम तथा सार्वजनिक सुव्यवस्था कायम गरी आम नागरिक र सम्पत्तिको रक्षा गर्ने प्रमुख कार्य प्रहरी संगठनको हो भन्ने कुरालाई अझ सार्थक पार्न यो गीतमा प्रहरीको कथा समेटिएको निर्माण पक्षले जनाएको छ ।
भिडियोमा दिनेश बिष्ट, भिम खड्का, दिपा पनेरु, प्रियंका शिवाकोटी, हीर शाही ‘संगीता’, ओम प्रसाद शिवाकोटी, विशाल नेपाल, निर्मल बिष्ट, रोहित घिमिरे, सुक्मन जंग अश्रपती, रोशन बोगटी, दिनेश जोशी, बिरेन्द्र कलेल, अर्जुन बम आदिको अभिनय रहेको छ । जसमा प्रकाश खड्काको छायाँकन रहेको छ ।
