काठमाडौं । ओटिटी प्लेटर्फम प्राइम भिडियामा दुई सृँखलासम्म सर्वाधिक रुचाईएको बलिउडको वेभ सिरिज ‘द फेमिली म्यान’ को तेश्रो सिजनको अहिले निर्माण तयारी हुँदैछ । यो रिलिजको लागि दुई नेपाली कलाकार अभिनेता सुनिल थापा र अर्का अभिनेता एवम् पूर्व इन्डियन आईडल प्रशान्त तामाङ अनुबन्धित भएका छन् ।
यो सिरिजको सुटिङमा आफु शुक्रबारबाट अनुबन्धित भएको अभिनेता सुनिल थापाले राजधानीलाई बताएका छन्,‘द फेमिली म्यान–३ को सुटिङको लागि म अहिले भारतको नागाल्यान्डमा आएको छु । हाम्रो प्रशान्त तामाङ पनि मसँगै यो सिरिजमा अभिनय गर्दै हुनुहुन्छ ।’ बिगतमा ‘आइएमडिबी’मा मात्र ८.७ रेटिङ प्राप्त गर्न सफल भारतीय वेभ सिरिज द फेमिली म्यानमा कामगर्न पाउँदा निकै खुसी लागेको सुनिल थापाले बताएका छन् ।
अभिनेत्री प्रियँका चोपडासँग चलचित्र मेरी कममा अभिनय गरेका सुनिल थापालाई केही महिना अघि द फेमिली म्यान ३ को लागि प्रस्ताव आएको थियो । नेपाली चलचित्रको छायाँकनमा व्यस्त रहेको सुनिल थापाले नेपालको छायाँकन सकेर उनी यतिबेला यो वेभ सिरिजमा आबद्ध भएका हुन् । यो सिरिजमा अभिनेता मनोज बाजपेयी, दीलिप ताहिलसहित बलिउडका थुप्रै कलाकार रहेको पनि अभिनेता सुनिल थापाले बताएका छन् ।
गतवर्ष भारतको अर्को चर्चित वेभ सिरिज ‘पाताल लोक’को दोस्रो सिजनमा शिर्ष भूमिका निभाएका प्रशान्त तामाङले गतवर्ष नेपाली चलचित्र परदेशी २ मा अभिनय गरेका थिए । यी गायक एवम् अभिनेता पहिले द फेमिली म्यान ३मा अभिनयरत छन् ।
