काठमाडौं । चलचित्र पूर्णबहादुरको सारंगीको सफलतापछि गायक तथा अभिनेता प्रकाश सपुतलाई भ्याई नभ्याई छ । यतिबेला आफ्नै व्यानरमा निर्माण भईरहेको चलचित्र ‘बसन्त’को निर्माणमा प्रकाश व्यस्त छन् । यसैबीच उनी अरु तीनवटा चलचित्रमा आवद्ध भईसकेका छन् ।
जसमध्य उनको अर्को चलचित्र ‘सोल्टिनी’को निर्माण घोषणा गरिएको छ । चलचित्र बसन्तको छायाँकन सम्पन्न गर्न लागेको प्रकाश अव दुई सातापछिबाट चलचित्र सोल्टिनीको छायांकनमा जोडिने भएका छन् । यो चलचित्र १० पुषबाट छायांकन सुरु गरिने भएको छ ।
चलचित्र रङ्गेली निर्देशक अर्जुन सुवेदीले नयाँ चलचित्र सोल्टिनीको मंगलबार निर्माण घोषणा गरेका छन् । यो चलचित्र शिर्षक भिडियो सार्वजनिक गर्दै चलचित्रको निर्माण घोषणा गरिएको हो ।
अभिनेता प्रकाश सपुतले अहिले निर्माण गरेको चलचित्र बसन्त जातीय विभेदको कथामा रहेको छ । यस्तै अब बन्ने चलचित्र सोल्टिनी पनि जातीय विभेदको कथामा रहेको यसका निर्देशकले बताएका छन् । लामो समयदेखि जातीय विभेदका बिरुद्ध आवाज उठाईरहेका कारण पनि सोल्टिनीमा प्रकाश सपुतलाई नै अनुबन्धित गरिएको पनि निर्देशक अर्जुनको भनाई छ ।
चलचित्रमा प्रकाश सपुत र परीक्षा लिम्बुलाई प्रमुख भूमिकामा प्रस्तुत गरिएको छ । भोजपुरबाट यो चलचित्रको छायांकन सुरु गरिने निर्देशक अर्जुनले बताएका छन् । प्लानेट थ्री फिल्म्सको प्रस्तुति तथा नेपसिनेको र योलो इन्टरटेन्मेन्टको सहकार्यमा बन्न लागेको यो चलचित्रको अहिले अभिनय कार्यशाला चलिरहेको छ । चलचित्र घोषणासँगै रिलिज मिति पनि २०८२ सालको ३ असोज संविधान दिवसको दिनलाई तोकिएको छ ।
