काठमाडौं । नेपाली कांग्रेसमा आस्था राख्ने कर्मचारी युनियनले पार्टी सभापति शेरबहादुर देउवासँग आइतबार भेट गरेका छन् । सभापति देउवा निवास पुगेर उनीहरुले भेट गरेका हुन् । भेटमा सभापति देउवालाई निजामति विधेयकमा सुधार गर्नुपर्ने सुझाव दिएका छन् । निजामति कर्मचारी विधेयकमा केही विषय सुधार गर्न सभापति देउवालाई उनीहरुले भेटेका हुन् ।
युनियनका कर्मचारीले अवकाश उमेर ५८ बाट ६० वर्ष बनाउँदा ६ महिनादेखि २ वर्षको संक्रमणकाल दिनुपर्ने, अतिरिक्त सचिवको कार्यकाल तोक्नुपर्ने, १२ वर्ष सेवा पुगेका कर्मचारीको एक तह बढुवा गर्नुपर्ने, उपसचिव र सहसचिवको परीक्षामा हालकै ५ वर्षे सेवा अवधि कायम राख्नुपर्ने र निजामति कर्मचारीको परिभाषामा तीनै तहका कर्मचारी समेट्नुपर्ने सुझाव बुझाएको बुझिएको छ ।
हाल राज्य व्यवस्था समितिबाट पारित भई संसद्को पूर्ण बैठकमा पुगेको यो विधेयकमा देउवाले संसदमार्फत संशोधनका लागि प्रयास गर्ने आश्वासन दिएको बताइएको छ ।
