पोखरा । राजधानीबाहिर पहिलोपल्ट पोखरामा आर्चरीको राष्ट्रिय इन्डोर आर्चरी च्याम्पियनसिप सुरु भएको छ । सातौं संस्करणको सो प्रतियोगिता पोखरा रंगशालास्थित बहुउद्देश्यीय कभर्ड हलमा सुरु भएको हो । २ दिनसम्म चल्ने प्रतियोगिताको राष्ट्रिय खेलकुद परिषद् (राखेप) सदस्यसचिव टंकलाल घिसिङले उद्घाटन गरे ।
प्रतियोगितामा तीन विभागीय टोली, कोशी प्रदेश, बागमती र गण्डकी प्रदेशका दुई टिम गरी कुल ७ टिमका ७० जना खेलाडीले भाग लिएका छन् । तीमध्ये महिला खेलाडी २२ र पुरुष ४८ जना हुन् ।
रिकर्भ महिला÷पुरुष, रिकर्भ टिम इभेन्ट, रिकर्भ मिक्स इभेन्ट, कम्पाउण्ड महिला÷पुरुष इन्डिभिजुअल, स्टाण्डर्ड महिला÷पुरुष इन्डिभिजुअल, स्टाण्डर्ड मेन्स टिम इभेन्ट र मिक्स इभेन्ट गरी कुल १० इभेन्टमा १० स्वर्ण, १० रजत र १० काश्य पदकका लागि प्रतिस्पर्धा हुने प्रतियोगिता संयोजक योगेन्द्र शेरचनले जानकारी दिए ।
राखेप र प्रदेश खेलकुद परिषद् गण्डकीको सहयोग तथा नेपाल आर्चरी संघको प्राविधिक सहयोगमा भएको प्रतियोगितामा एकसे एक खेलाडीले बो र एरो समात्दा निकै सुन्दर दृश्य देखिएको थियो ।
यसैबीच, पहिलो दिन ¥याङ्किङ राउण्डका खेलहरू सम्पन्न भए भने केही खेल इभेन्टमा गण्डकीले काश्य पदक हात पारेको छ ।
आर्चरी संघ गण्डकीका अध्यक्ष किशोरकुमार गुरुङले आर्चरी खेलको ग्रासरुटबाटै विकासका लागि स्कुलमा छिर्नुपर्ने बताए । उनले भने, ‘स्कुल नपसेसम्म तल्लो तहबाट खेलको विकास हुन सक्दैन । युवा पनि हामीहरुले पाउँदैनौं ।’
