पोखरा । यही ३० जेठबाट नेपालसहित विभिन्न देशमा रिलिज हुने दिनेश राउत निर्देशित नेपाली चलचित्र ‘महाभोज’को पोखरामा प्रिभ्यू प्रिमियर गरिएको छ । सोमबार साँझ चिप्लेढुंगास्थित क्यूएफएक्स ट्रेड मलमा भव्य रूपमा प्रिमियर गरिएको हो । प्रिमियरमा दर्शकले सहकारी ठगीविरुद्ध नाराबाजीसमेत गरेका थिए ।

प्रिमियर सोमा यो चलचित्र हेर्न कलाकारसँगै पोखराका मेयर धनराज आचार्य, कास्कीका प्रमुख जिल्ला अधिकारी रुद्रादेवी शर्मा, केही सहकारीपीडित, विभिन्न संघसंस्थाका प्रतिनिधि, पत्रकारसमेत पुगेका थिए ।

यस्तै, काठमाडौंबाट पोखरा आएका यस चलचित्रका प्रमुख कलाकार आर्यन सिग्देल, खगेन्द्र लामिछाने, अञ्जना बराइली, मलिका महत, बुद्धि तामाङ, निर्देशक दिनेश राउत र निर्माता हिमाल कडरियालगायत पनि प्रिमियर सोमा उपस्थित थिए ।

यस चलचित्रले सहकारी संकट तथा पीडितको कथावस्तु बोकेको छ । चलचित्रको छायांकन पोखरानजिकै घाचोकमा गत वर्ष गरिएको थियो । केही दृश्य काठमाडौंमा पनि खिचिएको थियो । यसरी पोखरा आसपास यसको छायांकन गरिएका कारण पनि पोखरामा प्रिमियर सो आयोजना गरिएको यसका निर्देशक दिनेश राउतले बताए ।

यो चलचित्र हेरिसकेपछि पोखरेली दर्शकले यसको कथा, प्रस्तुति शैली र कलाकारको अभिनयको प्रशंसा गरे । केही दर्शकमा एक प्रकारको आक्रोश उब्जियो । आफ्नै कथा व्यथा बोकेको चलचित्र भन्दै महाभोजले विगतमा नेपाली चलचित्र आगोले जस्तै विद्रोह जन्माउन सक्ने प्रतिक्रिया उनीहरूले दिए । सत्ताधारीलाई नै तलमाथि गराउन सक्ने शक्ति यस चलचित्रमा रहेको भन्दै कसैको दबाबमा दृश्य काँटछाँट भए त्यसविरुद्ध आफूहरू उभिने चेतावनीसमेत उनीहरूले दिए ।

यस चलचित्रमा गाउँपालिका अध्यक्ष भूमिकामा देखिएका आर्यनले निर्वाचन लड्न सहकारीको पैसा चलाउँछन् । उनैका कारण सबै ठगिएको कथा यसमा प्रस्तुत छ । चलचित्रको प्रिमियर सकिएलगत्तै आक्रोशित केही दर्शकले नाराबाजी गर्न थालेपछि पोखराका मेयर आचार्य कुनै प्रतिक्रिया नै नदिई त्यहाँबाट बाहिरिएका थिए ।

निर्माण पक्षका अनुसार यस चलचित्रको केही दिनअघि काठमाडौंमा पनि प्रिभ्यु प्रिमियर भएको थियो । महाभोजले सहकारीपीडितको कथालाई विस्तृतमा प्रस्तुत गरेको भन्दै दर्शकले सकारात्मक प्रतिक्रिया दिएका थिए ।

यस चलचित्रको पोखरापछि बुटवल, विराटनगर र धरानमा पनि प्रिमियर हुने निर्माण पक्षले जनाएको छ ।

क्लक वर्क क्रियसन र पिक्चर फ्रेमको प्रस्तुतिमा यो चलचित्र निर्माण भएको हो । हिमाल कडरिया निर्माण रहेको चलचित्रको कार्यकारी निर्माता किरण नेपाली हुन् । दुई साताअघि प्रदर्शनमा आउने भनिएको यो चलचित्र राजावादीको आन्दोलनको कारण देखाउँदै निर्माण पक्षले प्रदर्शन ३० जेठसम्म धकेलेको थियो । यो चलचित्र यही शुक्रबारबाट रिलिज हुँदै छ ।

सम्बन्धित समाचार

रसिकलाई घरमै पुगेर राष्ट्रिय स्रष्टा सम्मान प्रदान पुरस्कार प्रदान गर्दै नाफामा राष्ट्रिय ललितकला प्रदर्शनी सुरु रजनीकान्तको ‘जेलर २’ को विशेष भूमिकामा विद्या बालन गायक एवम् संगीतकार गणेश रसिकको निधन ‘गजल गायनको स्वर्ण दशक’ दोस्रो वर्षमा हाउसफुल-५ को बक्स अफिसमा सुखद शुरुवात लमजुङ लोकतारा एकल गायन प्रतियोगिता सुरु राष्ट्रिय लोकदोहोरी गीत आइडलमा ६१ समूहबिच प्रतिस्पर्धा