काठमाडौं । कलाकार लक्ष्मी श्रेष्ठ (अप्सरा आमा)को शुक्रवार राती निधन भएको छ । उनी पछिल्लो समय क्यान्सरबाट बिरामी भएर घरमै थलिएकी थिइन् । एक महिना भन्दा लामो समयदेखि धापासी क्षेत्रमा रहेको घरमै थलिएकी अप्सरा आमाको घरमै निधन भएको परिवारले जानकारी गराएका छन् ।

उनको शनिवार बिहान पशुपति आर्यघाटमा अन्त्यष्टी गरियो । अन्त्यष्टी अघि पशुपति क्षेत्रमा उनको श्रद्धाञ्जली कार्यक्रम राखिएको थियो । चलचित्र विकास बोर्डका अध्यक्ष दिनेश डिसी, कलाकारहरू दीपकराज गिरी, दीपक प्रसाद आचार्य, रामचन्द्र अधिकारी, सुशीला निरौला (विमली)लगायत विभिन्न कलाकारले उनको पार्थिव शरीरमा पुष्प गुच्छा चढाउँदै श्रद्धाञ्जली अर्पण गरेका थिए ।

उनको अन्त्यष्टीमा दुइृ सन्तान (एक छोरा र एक छोरी) उपस्थित थिए । परिवार सदस्यका अनुसार १३ वर्षको उमेरमा उनले आफू भन्दा २२ वर्ष जेठोसँग विवाह गरेकी थिईन् । उनको श्रीमानको निधन ४० वर्ष अघि नै भएको थियो । उनले आफ्ना सन्तान हुर्काएर बल्ल कला यात्रामा आफूलाई समर्पण गरेकी थिईन् ।

उनी पछिल्लो समय हास्य टेली चलचित्र उल्टो सुल्टोमा अभिनयरत थिइन् । सोही क्रममा उनलाई क्यान्सरको समस्या देखिएको थियो । स्तन क्यान्सरको चौथो चरणमा पुगेपछि उनको रोगको पहिचान भएको थियो । कलाकार लक्ष्मीको उपचारमा पछिल्लो समय हास्य विधामा कार्यरत कलाकारहरूले आर्थिक सहयोग पनि गर्दै आएका थिए ।

उनलाई निर्देशक दिनेश डिसीले २०५२ सालमा ट्वाक्क टुक्क हास्य सृंखलाबाट अभिनयमा ल्याएका थिए । त्यसपछि उनले हिजो आजका कुराका धेरै सृंखलामा अभिनय गरेकी थिइन् । हास्य अभिनेता सीताराम कट्टेलको जोडी बनेर उनले हास्य टेली चलचित्र मेरी बास्सैमा अप्सरा आमाको रूपमा लामो समय अभिनय गरेकी थिइन् । मेरी बास्सैमा लक्ष्मीले सीताराम कट्टेलको चरित्र खड्काजीको श्रीमती अर्थात् अप्सरा आमाको भूमिका निर्वाह गरेकी थिइन् । चञ्चल तर छुच्चो चरित्रका कारण उनी यही सृंखलाबाट अप्सरा आमाको रूपमा लोकप्रिय भएकी थिइन् । त्यसपछि लक्ष्मीले जिरे खुर्सानी, कान्छी सहित थुप्रै टेली सृंखला एवम् म्युजिक भिडियो र चलचित्र लक्का जवानमा पनि अभिनय गरेकी थिइन् ।

उनी निकै बिरामी भएको जानकारी पाएपछि गत साता सीताराम कट्टेल, कुञ्जना घिमिरे लगायतका कलाकारले उनलाई घरमै भेटेर उपचारको लागि सहयोग पनि प्रदान गरेका थिए । उनको निधन प्रति दुःख व्यक्त गर्दै सामाजिक सञ्जाल मार्फत हास्य कलाकारहरू तथा शुभ चिन्तकले श्रद्धा सुमन अर्पण गरेका छन् ।

सम्बन्धित समाचार

नाट्य संगीतको प्रज्ञा पुरस्कारबाट आठ स्रष्टा पुरस्कृत अहिलेसम्मकै ठुलो धनराशी पुरस्कार रहेको व्राण्ड एम्वेसडर हन्ट सुरु ‘विवाहित महिला सौन्दर्य’मा लक्ष्मीदेवी सर्वोकृष्ट ४० वटा चलचित्र घरमा ऊनको स्वीटरको ५१ औँ दिन अभिनेत्री शेफालीको मृत्युको कारण ‘बुढ्यौली प्रतिरोधी सुई’ गायिका एलिना र समीक्षाले भेटे गृहमन्त्री, भेटपछि यसाे भन्छिन एलिना