बेसीशहर । नेपाल कम्युनिष्ट पार्टी (एमाले) को ११ औँ राष्ट्रिय महाधिवेशनका लागि लमजुङ जिल्लामा अत्यन्तै न्यून ३९.१ प्रतिशतमात्र मतदान भएको छ । मतदान कार्यको समय शनिबार अपराह्न ४ बजेसम्मका लागि सयम निर्धारण गरिएको थियो ।
मतदान सम्पन्न भएपछि साँझ ५ बजेसम्म मतदान भएको मुचुल्का तयार भएको एमालेको निर्वाचन समितिले जनाएको छ । यो निर्वाचन आन्तरिक भएको हुँदा ८० प्रतिशतभन्दा बढी मतदात हुने आंकलन गरिएको थियो ।
एमालेको लमजुङमा कुल संगठित सदस्य संख्या पाँच हजार ४७३ जना रहेको छ । तीमध्ये मतदानमा दुई हजार १४० मात्रले भाग लिएका छन् । जसको ३९.१ प्रतिशत हुन्छ । त्यस्तै, कुल मतदातामा दलितको संख्या ७५८ जना रहेका छ । कुल मतदाता संख्यामा दलित संख्या घटाउँदा चार हजार ७१५ हुन्छ । तीमध्ये मतदानमा एक हजार ९१७ मात्रले भाग लिएका छन् । यो ४०.६५ प्रतिशत हुन आउँछ । त्यस्तै दलिततर्फ २२३ जनाले भाग लिएको एमालेको निर्वाचन समितिले जनाएको छ । दलिथ मतदाता संख्यामा मतदान भएको प्रतिशतका हिसावले त्यो संख्या २९.४१ प्रतिशत हुन आएको छ ।
दलितका हकमा छुट्टै प्रावधान बनाई खुलातर्फ दलितले भोट दिन नपाउने र दलितलाई खुलातर्फका प्रतिनिधिले भोट दिन नपाउने प्रावधान रहेको एमालेका जिल्ला सदस्य एवम् कार्यालय सचिव सरोज विश्वकर्माले बताए । उनका अनुसार यदि कोही दलित खुलातर्फ जान चाहेमा जान सक्ने र त्यसको म्याद मंसिर ६ गतेसम्म रहेको थियो । उनले भने, ‘त्यसरी एकजना दलित खुलातर्फ गएका छन् ।’
लमजुङबाट खुल्ला तर्फ ४ जनाका लागि १८ जनाको दावी परेको छ । नमिा सुभाष पौडेल, कृष्णप्रसाद अधिकारी, युवराज अधिकारी, राजकुमार विष्ट, प्रेमबहादुर घले, ईश्वर पौडेल, गोविन्द बस्नेत, सिंहवहादुर थापा, भीमवहादुर गुरुङ, अर्जुन गुरुङ, वुद्धीबहादुर खडका, रञ्जित कुमाल, मोहनहरी पौडेल, लोकराज पाण्डे, आलोक गुरुङ, अञ्जनकुमार हिमाली, जितबहादुर गुरुङ र जनकराज मिश्र छन् ।
महिला क्षेत्रतर्फबाट निर्वाचित हुने जनामा ८ जना प्रत्यासीहरू छन् । उनीहरूमा यशोदा रिमाल, विष्णुमाया राना, बुनाकुमारी रिमाल, कल्पना थापा बोहरा, लक्ष्मीदेवी अधिकारी, भवानी के.सी., पदमा गुरुङ र पवित्रा थापा राना हुनुहुन्छ ।
यसैगरी, युवा क्षेत्रतर्फ एक जना प्रतिनिधि चयन हुनेमा जुनवहादुर तामाङ, राजेन्द्र अधिकारी र प्रेम(रोशन) तामाङ प्रत्यासी हुनुहुन्छ भने दलिततर्फ २ जना छनौट हुनु पर्नेमा प्रत्यासी संख्या तीन रहेको छ । जसमा नन्दराम विक, विवश बुढाथोकी र हिरालाल विश्वकर्मा रहेका छन् ।
एमालेको यही महिनाको अन्तिम साता संघीय राजधानी महाधिवेशन प्रतिनिधि १० जना छनोट हुनेमा खुलातर्फबाट ४ जना, महिलातर्फ ३ जना, दलिततर्फ २ जना र युवा क्लस्टरबाट १ जना प्रतिनिधि चयन हुने प्रावधान अनुसार सबै क्लष्टरका लागि मतदान भएको हो । महाधिवेशन प्रतिनिधिका लागि लमजुङमा कोटाभन्दा धेरै आकांक्षीहरू भएपछि मतदान हुने स्थिति उत्पन्न भएको हो ।
कुल १० जना महाधिवेशन प्रतिनिधि चयन हुनेमा ४० जनाले उम्मेदवारी मनोनयन दर्ता गराएका थिए । जसमा खुल्लातर्फ २१ जना, महिलातर्फ १० जना, दलितमा ५ जना र युवातर्फ ४ जना आकांक्षीहरूले उम्मेदवारी मनोनयन दर्ता गराएका थिए । हिजो साँझसम्म रहेको मनोनयन फिर्ता गरी उल्लेखित संख्याका प्रत्यासी अन्तिममा रहनु भएको हो । महाधिवेशन प्रतिनिधिका लागि एमालेमा जिल्ला अध्यक्षले समेत निर्वाचित भएर जानु पर्ने प्रावधान रहेको हुँदा जिल्ला अध्यक्ष राजकुमार विष्टसमेत महाधिवेशन प्रतिनिधिको प्रत्यासी छन् ।
आज निर्वाचित हुने १० जना महाधिवेशन प्रतिनिधि बाहेक एमाले लमजुङबाट उपमहासचिव पृथ्वीसुब्बा गुरुङ, केन्द्रीय सदस्य एवम् अनेमानसंघका केन्द्रीय अध्यक्ष टुका हमाल, एमाले केन्द्रीय सदस्य जमीन्द्रमान घले, डा. भिष्म अधिकारी, कल्पना थापा, केन्द्रीय अनुसासन समितिका सदस्य मायानाथ अधिकारी समेत छ जना स्वतः महाधिवशेन प्रतिनिधि हुने पार्टी जिल्ला अध्यक्ष राजकुमार विष्टले बताए । उनका अनुसार जिल्लाबाट कुल १६ जना महाधिवशेन प्रतिनिधिले भाग लिने छन् ।
एमालेको ११औं महाधिवेशन काठमाडौँमा यही मंसिर २७ गतेदेखि २९ गतेसम्म हुने तयारी छ ।
