काठमाडौं । पछिल्लो एक सातायता कोरोना भाइरस संक्रमण दर उच्च रूपमा बढेको छ । ५ जेठदेखि ११ जेठसम्मको अवधिमा तीन महिनायताकै संक्रमण दर उच्च रहेको छ । एक साताको अवधिमा ३ सय १३ जना संक्रमित थपिएका छन् ।
नेपालमा १० माघ २०७७ मा पहिलोपटक ३२ वर्षीय युवकमा कोरोना भाइरस संक्रमण पुष्टि भएको थियो । संक्रमण पुष्टि भएदेखि ४ जेठसम्म संक्रमितको संख्या २ सय ९५ रहेको थियो ।
गत ५ जेठमा ८० जना, ६ जेठमा २७ जना, ७ जेठमा २५, आठ जेठमा ३०, ९ जेठमा ५९, १० जेठमा ६८ र आइतबार २४ जना संक्रमित थपिएको स्वास्थ्य तथा जनसंख्या मन्त्रालयको तथ्यांकमा उल्लेख छ । जनस्वास्थ्य विज्ञहरूले परीक्षणको दायरा केही बढाइएकाले संक्रमण दर बढेको बताएका छन् ।
एक हप्तामा संक्रमणको दर
जेठ संक्रमित (थप)
५ गते ८०
६ गते २७
७ गते २५
८ गते ३०
९ गते ५९
१० गते ६८
११ गते २४
संक्रमितमध्ये अहिलेसम्म तीन जनाको निधन भएको छ । नेपालमा संक्रमित पुष्टि भएको चार महिनाको अवधिमा कोरोना भाइरस संक्रमितको संख्या ६ सय आठ पुगेको छ । संक्रमितमध्ये ५ सय २९ पुरुष र ७९ जना महिला रहेका छन् ।
स्वास्थ्य मन्त्रालयका प्रवक्ता डा. विकास देवकोटाका अनुसार ५ सय १३ जना आइसोलेसनमा उपचाररत छन् । उपचाररत सबैको स्वास्थ्य अवस्था सामान्य रहेको स्वास्थ्य मन्त्रालयले जनाएको छ । देशभर ३९ हजार ८ सय ४ जना क्वारेन्टाइनमा बसेका छन् ।
हालसम्म ८७ जना डिस्चार्ज भइसकेको स्वास्थ्य मन्त्रालयले जनाएको छ । संक्रमितमध्ये ५ सय २१ जना उपचाररत रहेको र अधिकांशमा लक्षण देखिएको छैन । यसरी हेर्दा संक्रमितमध्ये निको भएर डिस्चार्ज हुने दर १४ प्रतिशत रहेको छ ।
आरटी–पीसीआर प्रविधिबाट ४८ हजार ८ सय १५ जनाको कोरोना परीक्षण भएको स्वास्थ्य मन्त्रालयका प्रवक्ता डा. देवकोटाले बताए । हालसम्म ४२ जिल्लाका नागरिकमा कोरोना भाइरस संक्रमण पुष्टि भएको छ ।
स्वास्थ्य मन्त्रालयका अनुसार सबैभन्दा बढी बाँके जिल्लामा १ सय ४२ जनामा संक्रमण देखिएको छ । पर्सामा ९४ जना संक्रमित फेला परेका छन् ।
रूपन्देहीमा ४३, उदयपुरमा ३३, झापामा ३५, सर्लाहीमा ३५ र रौतहटमा २३ जनामा संक्रमण देखिएको छ । यस्तै, काठमाडौंमा १२, चितवन, भक्तपुर र नवलपरासीमा ६ तथा दाङमा पाँच जनामा संक्रमण देखिएको स्वास्थ्य मन्त्रालयले जनाएको छ ।
