बर्दिया । बर्दियामा शुक्रबार थप १५ जनामा कोरोना संक्रमण पुष्टि भएको छ । बाँकेको नेपालगंजस्थित भेरी अस्पतालको प्रयोगशालामा गरिएको परीक्षणमा बढैयाताल गाउँपालिकाका ९ जना, गुलरिया नगरपालिकाका ४ जना र मधुवन नगरपालिकाका २ जना गरी जम्मा १५ जनामा कोरोना संक्रमण पुष्टि भएको स्वास्थ्य कार्यालय बर्दियाका जनस्वास्थ्य निरीक्षक कृष्णगोपाल चौधरीले जानकारी दिए ।
स्वास्थ्य कार्यालयका अनुसार बढैयाताल गाउँपालिका वडा नं २ का ६ जना, वडा नं २ जना र वडा नं ७ का १ जनामा ९ जनामा कोरोना संक्रमण पुष्टि भएको छ । यसैगरी गुलरिया नगरपालिकाको वडा नं २ का १ जना, वडा नं ४ का १ जना, वडा नं ५ का १ जना र वडा नं ८ का एक जनामा गरी ४ जनामा कोरोना पुष्टि भएको छ ।
मधुवन नगरपालिकाको वडा नं ४ र ६ मा एक/एक जना गरी २ जनामा कोराना पुष्टि भएको स्वास्थ्य कार्यालय बर्दियाले जनाएको छ । शुक्रबार एकैसाथ १८ जनामा संक्रमण पुष्टि भएसँगै बर्दियामा कोरोना संक्रमितको संख्या ७५ पुगेको छ । संक्रमण देखिएका सबैलाई सम्बन्धीत पालिकामा तयार पारिएको आइशोलेसन कक्षमा राखिने बताइएको छ । यसैगरी बर्दियामा ७ जनाले कोरोना जितेर घर फर्केका छन् ।
