डडेल्धुरा । डडेल्धुरा अस्पताल डडेल्धुरालाई ह्युमिनिटी फाउन्डेसन नेपालले सोमबार कोरोना परिक्षण मेसिन हस्तान्तरण गर्ने भएको छ । शुक्रबार काठमाण्डौंबाट ट्रकमार्फत पठाइएको मेसिन सोमबार डडेल्धुरा पुग्ने डडेल्धुरा अस्पताल विकास समिति अध्यक्ष करुणाकर ओझाले बताए ।
राजमार्गका केही भागहरुमा पहिरोले बाटो अवरुद्ध भएकोले डडेल्धुरा पुग्न केही ढिलाई भएको र आज रातिसम्म धनगढी पुग्ने र आइतबार बेलुका डडेल्धुरा पुग्ने समेत अस्पताल विकास समिति अध्यक्ष ओझाले बताए । ह्युमिनिटी फाउन्डेसन नेपालले सुदुरपश्चिम तथा विदेशमा बस्दै आएका विभिन्न सामाजसेवी तथा दाताहरुबाट संकलन गरियउको रकमले मेसिन खरिद गरि डडेल्धुरा असपताललाई हस्तान्तरण गर्न लागिएको फाउन्डेसन नेपालका अध्यक्ष श्याम तायलले बताए ।
फाउन्डेसनले हस्तान्तरण गर्ने कोरोना परिक्षण मेसिनलाई अस्पतालमै भएको संरचनामा जडान गरी एक हप्ताभित्र संचालनमा ल्याउने तयारी भइरहेको निमित्त मेडिकल सुपरिटेन्डेनट जगदीश चन्द्र विष्टले बताए । अस्पतालले केही दिनअघि मात्रै अत्याधुनिक क्षमताको ल्याब मेसिन खरिद गरी स्थापना गरेको र अस्थाई प्रयोगशालाको कार्य पनि अन्तिम चरणमा रहेको अस्पताल विकास समिति अध्यक्ष ओझाले बताए ।