बारा । मोटरसाइकल चोरी गर्ने गिरोहलाई २४ घण्टा भित्र नेपाल प्रहरीले पक्राउ गर्न सफल भएको छ । चोरी भएको मोटरसाइकल धनीले दिएको सुचनाको अधारमा २४ घण्टा नबित्दै मोटरसाइकल चोरी गर्ने २ जनालाई समेत प्रहरीले नियन्त्रणमा लिन सफल भएको छ ।
बाराको कलैया उपमहानगरपालिका वडा नम्वर ४ घरबाट मोटरसाइकल चोरी भएको प्रहरीले जनाएको छ । देवताल गाउँ पालिका वडा नम्वर ३ बस्ने राजु कुमार कुशवाहाको नाममा रहेको बा ७६ प १६९४ नम्वरको पल्सर र मोवाईल एक थान चोरी भएको थियो ।
चोरीको उजुरी परेसँगै जिल्लाको मातहत रहेको प्रहरीको सवै युनिटहरुमा खवर गरेको प्रहरी उपरिक्षक कृष्ण पंगेनीले जानकारी गराए । खवर गरेसँगै सिम्रौनगढ मातहत रहेको प्रहरी कार्यलयको युनिटले चोरी भएको मोटरसाईकलसहित दुई जनालाई पक्राउ गरेको प्रहरी उपरिक्षक पंगेनीले बताए ।
पक्राउ पर्नेमा कलैया उपमहानगरपालिका वडा नम्वर ३ बस्ने वर्ष १९ को सरफराज मिया र वर्ष २२ का जफिर आलम रहेको उनले जानकारी गराए । निजहरुले चोरी गरेको मोटरसाइकलसहित भाग्दै गर्दा सिम्रौनगढ नगरपालिका वडा नम्वर ९ स्थित रौतहटको सिमानासँग जोडिएको अडुवा खोलाको पुलमा दुवैलाई पक्राउ गरिएको हो । बरामद गरिएको मोटरसाईकल र मोवाईल सवारी धनीलाई बोलाई जिम्मा लगाइएको प्रहरीले जानकारी गराएको छ ।