सप्तरी । सप्तरीमा विद्युतीय धरापमा परि शनिबार जंगली हात्तीको मृत्यु भएको घटनाप्रति जिल्ला वन कार्यालय सप्तरीले चिन्ता व्यक्त गरेको छ । विद्युतीय धराप पारेर हात्तीलाई मारिनु गैरकानुनी समेत रहेको भन्दै जिल्ला वन अधिकृत सन्तोष झाले जंगली जनावरको सुरक्षाका लागि टाक्सफोर्स गठन आवश्यकतामा जोड दिएका छन् ।
डेढ महिनाअघि सप्तरीको कंचनरुप नगरपालिका ५ स्थित परेमारामा कोशी टप्पु वन्यजन्तु आरक्षबाट आएको अन्दाजी २०/२१ वर्षको हात्ती विद्युतीय पोलमा करेन्ट लागेर मृत्यु भएको थियो । पछिल्लो पटक शनिबार सोही ठाउँबाट आएको अर्को १८/१९ वर्षीय हात्ती खडक नगरपालिका ४ अमाहाका कृषक गोसाईराम चौधरीले गहुँबालीको सुरक्षाका लागि खेतमा जडान गरेको विद्युतीय तारमा परी मरेको हो ।
जंगली जनावरलाई विद्युतीय पासो थापेर यसरी मार्ने काम गैरकानुनी भन्दै वन अधिकृत झाले यो मानव तथा वन्यजन्तुबीचको डरलाग्दो स्वरुप भएको समेत बताएका छन् । विद्युतीय धराप थाप्ने व्यक्ति हाल फरार रहेको जानकारी दिँदै उनले निजमाथि कानुनी कारवाही गरिने समेत बताएका छन् ।
वन्यजन्तुहरुको संरक्षणका लागि जनचेतनामूलक कार्यक्रम समेत अघि बढिसकेको उनको भनाई छ । यसैबीच शनिबार मरेको हात्तीलाई पण्डित समेतको उपस्थितिमा हिन्दु परम्परा अनुसार घटनास्थल नजिकै गहिरो खाडल खनेर अन्त्येष्टि गरिएको वन अधिकृत झाले जानकारी दिएका छन् । हात्तीको अन्त्येष्टिका लागि जिल्ला वन कार्यालयले आवश्यक सबै खर्चको व्यवस्था मिलाएको वन अधिकृत झाले बताए ।
