लन्डन । इग्लिस प्रिमियर लिग फुटबलमा गएराति म्यान्चेस्टर सिटी र टोटनह्याम हट्सपर विजयी भएका छन् । तालिकाको शीर्ष स्थानमा रहेको म्यान सिटीले एस्टन भिल्लालाई उसैको मैदानमा २–१ ले हरायो । सिटीको जितमा फिल फोडेन र रोड्रिले एक एक गोल गरे । भिल्लाका जोन क्याक्गीनले पहिलो गोल गरेका थिए ।
खेलको ४१ औं मिनेटमा सिटीका जोन स्टोन्स र ५७ औं मिनेटमा भिल्लाका म्याटी क्यासले रातो कार्ड खाएपछि दुवै टोली १० जनामा समेटिएका थिए । प्रिमियर लिगकै अर्को खेलमा टोटनह्याम हट्सपरले साउथह्याम्टनलाई २–१ ले हरायो । टोटनह्यामको जितमा ग्यारेथ बेल र हिउङ मिन सनले एक एक गोल गरे ।
साउथह्याम्पटनका ड्यानी इंग्सले पहिलो गोल गरेका थिए । गएरातिका खेलहरुपछि प्रिमियर लिगको तालिकामा ३३ खेलबाट ७७ अंकसहित म्यान्चेस्टर सिटी शिर्ष स्थानमा रहेको छ । एक खेल कम खेलेको म्यान्चेस्टर युनाईटेड ६६ अंकसहित दोस्रो स्थानमा छ ।
