स्कृप्ट लेखनमा ऋषिराज

काठमाडौं । गत पुषबाट नेपालमा कोरोना संक्रमित घटेर दैनिक सयको संख्यामा झरेपछि निर्देशक ऋषिराज आचार्य आशावादी भए । उनलाई अब फेरि नेपाली चलचित्र माथि उठेर पुरानै अवस्थामा पुग्छ जस्तो लागेको थियो । त्यसैले उनले गत माघ, फागुनमा नयाँ चलचित्र चुरीफुरीको छायांकन गरे । यो चलचित्रलाई उनले आगामी १ असोजमा रिलिज गर्ने लक्ष्य लिएका थिए ।

नेपालमा कोरोनाको दोस्रो भेरियन्ट आएसँगै देखिएको महामारीका कारण अब नेपालका अवस्था कहिले सामान्य हुन्छ भन्ने टुंगो छैन । त्यसैले अब आफ्नो यो हास्यप्रधान चलचित्र आगामी १ असोजमा रिलिज होला कि नहोला भनेर यी निर्देशकले अनुमान लगाउन पनि सकेका छैनन् । नेपालका फिल्म हल अब कहिले खुल्ने भन्ने’bout अहिले नै भन्न सक्ने अवस्था पनि छैनन् । त्यसैले सम्पादनमा रहेको यो चलचित्रका काम निर्देशक आचार्यले गत १६ वैशाखपछिबाट गर्न सकेका छैनन् ।

१६ वैशाखदेखि जारी निषेधाज्ञामा घरबाट बाहिर निक्लन नपाएपछि अन्यले जस्तै निर्देशक ऋषिराज आचार्यले पनि आफूलाई कैदीसरह मानेका छन् । तथापि, निर्देशक आचार्य यतिबेला घरमै बसेर नयाँ फिल्मका लागि स्कृप्ट लेखिरहेका छन् । यदि परिस्थिति राम्रो भयो र १ असोजमै आफ्नो नयाँ चलचित्र चुरीफुरी रिलिज भयो भने त्यसको दुई महिनापछिबाट उनी अर्को नयाँ फिल्मको छायांकन सुरु गर्ने पक्षमा छन् । सोही कारण यो लकडाउनमा फुर्सदको समयलाई सदुपयोग गर्दै नयाँ चलचित्रको स्कृप्ट लेखिरहेको यी निर्देशकले बताएका छन् ।

यी निर्देशकको चलचित्रप्रति निकै लगाव छ । चलचित्र क्षेत्रमा डेढ दशकभन्दा लामो समय बिताइसकेका उनी कक्षा ७ मा पढ्दापढ्दै चलचित्रको नायक बन्छु भनेर आफ्नो जन्म थलो दाङदेखि भागेर काठमाडौं आएका थिए । पत्रिका पढेर निर्देशक निर्माताको ठेगाना पत्ता लगाएर उनले त्यतिबेला धेरै निर्माता निर्देशकको घर धाए । उनलाई पढाइ सकेर आउनु भनेर निर्माता निर्देशकले भनेपछि पुनः दाङ फर्किएका थिए । त्यसपछि एसएलसी सकेर काठमाडौं आएका उनी नायक त बन्न सकेनन् । त्यसैले चलचित्र निर्देशक शम्भु प्रधानको पछि लागे । प्रधानले उनलाई सहायक निर्देशकका रूपमा आफ्ना टेलिचलचित्र र चलचित्रमा काम गर्ने अवसर दिए । प्रधानकै संगतले उनले प्रधानको सहयोगी भएर स्कृप्ट पनि लेख्दै गए । प्रधानसँग ५ वर्ष सहायक भएर काम गरेपछि उनी मुम्बई हान्निए । त्यहाँबाट एक वर्षको निर्देशन प्रशिक्षण कोर्ष सम्पन्न गरेर नेपाल फर्केपछि सानो पर्दाबाट आचार्यले निर्देशन सुरु गरेका हुन् ।
मुम्बईबाट नेपाल आएपछि आफन्त, यात्रा जिन्दगीको, जस्ता टेलिचलचित्रको निर्देशन आचार्यले गरे । जुन नेपाल टेलिभिजनबाट प्रसारण भएका थिए । त्यसपछि सञ्जिवनी, विश्वास जस्ता सुपरहिट सिरियलहरू नेपाल टेलीभिजन प्लसबाट प्रसारण भएका थिए ।

करिब १५ सय एपिसोड जति टेलिसिरिएल निर्देशन गरिसकेपछि उनले चलचित्र मिस्टेकको निर्देशन गरेर ठूलो पर्दाको यात्रा सुरु गरेका थिए । मिस्टेकपछि आचार्यले सपना तिम्रो मेरो, सुन्तलीलाई भगाई लग्यो झिल्केले, ड्रिम गर्ल जस्ता चलचित्र निर्देशन गरेर दर्शकमाझ ल्याइसकेका छन् । उनका पछिल्ला तीनवटै चलचित्रले बक्स अफिसमा राम्रो व्यापार गरेको थियो । अझ ड्रिम गर्लत उनको सबैभन्दा सफल चलचित्र मानिन्छ ।

यतिबेला थुप्रै हास्य कलाकारलाई लिएर उनले चलचित्र चुरुफुरी बनाएका छन् । उनी यसपटक यो चलचित्रबाट जति धेरै आशावादी छन् । त्यत्तिकै चिन्तित पनि छन् । एउटा चलचित्र निर्देशनबाट ५ लाख रुपैयाँसम्म पारिश्रमिक लिने गरेको निर्देशक आचार्यले यसपटक चलचित्र चुरीफुरीमा आफैंले आधा लगानी गरेका छन् । कोरोनाका कारण सिनेमा हल बन्द भएको र हल कहिले खुल्ने भन्ने टुँगो नभएका कारण आफ्नो लगानीको ब्याज बढिरहेको भन्ने चिन्ता उनलाई छ । यो चलचित्रको आम्दानीबाट अर्को चलचित्र बनाउने सपना साँचेका उनी अहिले सोही कारण पनि नयाँ चलचित्रको स्कृप्ट लेखनमा व्यस्त भएका रहेछन् । आफूले चलचित्रबाहेक अरू केही नसोचेका कारण यसैमा उनी भविष्य खोजिरहेका छन् । कोरोनाको कहर केही महिनापछि काम हुने र बिगतको जस्तै खुलेर चलचित्र निर्देशन गर्दै हलसम्म दर्शकका लागि ल्याउने चाहना पूरा हुने आशामा उनी टिकिरहेका छन् ।

तपाइको प्रतिक्रिया
(Visited 396 times, 1 visits today)

Ads Space Available

epaper

भर्खरै

कहाँ छ त्यो शून्य सञ्चालक ?

कुरी-कुरी

राजधानी राष्ट्रिय दैनिक:कुरी-कुरी – असोज ८, २०८०
राजधानी राष्ट्रिय दैनिक:कुरी-कुरी – असोज ८, २०८०
पोखराको ६० प्रतिशत मतगणना, मेयरमा समाजवादी अग्रस्थानमै