सिन्धुली । जिल्लामा गएको चौविस घण्टामा कोरोनाका कारण तीनजना महिलाको मृत्यु भएको छ । २ जनाको राती र १ जनाको बुधबार विहान अस्पताल ल्याउँदै गर्दा मृत्यु भएको स्वास्थ्य कार्यालय सिन्धुलीले जनाएको छ ।
मृत्यु हुनेमा मरिण गाउँपालिका वडा नं. ४ की ५२ वर्षकी महिला, दुधौली नगरपालिका ११ की ९३ वर्षकी महिला र कमलामाई नगरपालिका ४ की ८२ वर्षकी महिला रहेका छन् ।
मरिणकी महिलाको कपिलाकोट प्राथमिक स्वास्थ्य केन्द्रमा, दुधौलीकी महिलाको घरमै र कमलामाईकी महिलाको सिन्धुलीको कोभिड १९ अस्पतालमा लाने क्रममा मृत्यु भएको स्वास्थ्य कार्यालय सिन्धुलीका कोभिड १९ फोकल पर्सन सन्तोष माझीले बताएका छन । दुधौली र मरिणकी महिलाको मंगलबार साँझ र कमलामाईकी महिलाका बुधबार मृत्यु भएको हो ।
दमको रोगी समेत रहेकी मरिणकी महिलाको जेठ ११ गते कोभिड १९ पोजेटिभ आएको थियो । दुधौलीकी महिलाको जेठ ३ गते र कमलामाईकी महिलाको जेठ १० गते कोरोना पोजेटिभ देखिएको थियो । हालसम्म जिल्लामा मृत्यु हुनेको संख्या २१ पुगेको छ ।
८४ जना नयाँ संक्रमित
यसैबीच सिन्धुलीमा ८४ जना नयाँ संक्रमित भेटिएका छन । संक्रमित हुनेमा कमलामाई, गोलञ्जोर गाउँपालिका, सुनकोशी गाउँपालिका, घ्याङ्लेख गाउँपालिका, तिनपाटन गाउँपालिका र मरिण गाउँपालिकाका व्यक्ति रहेका छन । जिल्लामा १७१ जनाको पिसिआर परिक्षण गरिएकोमा ८४ जनाको रिपोर्ट पोजेटिभ आएको हो । यो सँगै जिल्लामा कोरोना संक्रमित हुनेको संख्या १ हजार २ सय २७ पुगेको छ । मंगलबार जिल्लामा सबैभन्दा बढी ९३ जना नयाँ संक्रमित भेटिएका थिए ।
यसैबीच मंगलबार ७ जनाले कोरोना जितेर डिस्चार्ज भएका छन । उनीहरुसँगै जिल्लामा कोरोना जित्नेको संख्या १९० पुगेको छ ।