काठमाडौं । कलाकार तथा मोडल निशा घिमिरेलाई सहयोग मिल्ने क्रम जारी छ । उनी सदस्य रहेको राष्ट्रिय संगीतकर्मी संघ नेपालले निशालाई सहयोग कार्य सुरु गरेको छ । संघका महासचिब बिक्रमजंग शाहको संयोजकत्वमा संघले बिहीबार काठमाडौंको थापाथलीस्थित नर्भिक अस्पताल पुगेर निशाका बुबा प्रेमप्रसाद घिमिरेलाई आर्थिक सहयोग प्रदान गरेको छ ।
संघका महासचिव तथा विपत् व्यवस्थापन समितिका संयोजक शाहका अनुसार निशा सो संघकी सदस्य हुन् । सोही कारण निशाको उपचारको खर्च संकलनका लागि आफूहरूले पहल सुरु गरेको शाहले बताएका छन् ।
‘४ हजारभन्दा बढी सदस्य रहेको हाम्रो संघको ७४ जिल्लामा शाखा रहेको छ । ती शाखाबाट के–कति सकिन्छ, निशाको उपचार र उपचारका क्रममा विगतमा परिवारलाई परेको ऋणभारलाई कम गर्न पनि हामीले आर्थिक संकलन पहल सुरु गरेका हौं ।’ महासचिब शाहले भने, ‘दुई वर्षअघि पनि उहाँलाई हामीले ट्रमा सेन्टर पुगेर उपचारका लागि आर्थिक सहयोग गरेका थियौं ।’ संघले आफ्नो सदस्यलाई आपत् पर्दा बिगतमा पनि आर्थिक सहयोग प्रदान गर्दै आएको पनि शाहले जानकारी गराए ।
