सप्तरी, राजविराज । सप्तरीको तिलाठी कोइलाडी गाउँपालिका, बलान बिहुल गाउँपालिका तथा बोदेबरसाइन नगरपालिकामा विभिन्न कार्यक्रमको आयोजना गरि १८औं राष्ट्रिय धान दिवस मनाइएको छ ।
धान उत्पादनमा वृद्धि, खाद्य सुरक्षा आत्मनिर्भरता र समृद्धि नाराका साथ तिलाठी कोइलाडी गाउँपालिकाको वडा नं. ४ स्थित खेतमा धान रोपेर दिवस मनाइएको हो ।
सो अवसरमा बोल्दै गाउँपालिका अध्यक्ष सतिशकुमार सिंहले परम्परागत कृषि प्रणालीबाट आत्मनिर्भर नहुने भएकोले ब्यवसायिक एवम् प्रविधि मैत्री कृषि प्रणाली अपनाउनुपर्ने आवश्यकता रहेको बताए ।
कृषकलाई सहुलियत दिन गाउँपालिकाले विगत बर्षहरु देखि नै धान, गहुँ, मकै, सर्सों लगायतको बालीमा ५० प्रतिशतसम्म अनुदान उपलब्ध गराउँदै आएको बताए । अध्यक्ष सिंहले कृषकलाई आत्मनिर्भर बनाएमात्र समृद्धि ल्याउन सकिनेमा जोड दिए ।
गाउँपालिकाका प्रमुख प्रशासकीय अधिकृत केशवकुमार झाले कृषि कर्मलाई आधुनिकीकरण गर्नुपर्ने आवश्यकता रहेको बताउँदै गाउँपालिकाले विगत बर्षहरुदेखि नै कृषकलाई विभिन्न किसीमले सुविधाहरु प्रदान गर्दै आईरहेको र आगामी दिनमा पनि सहुलियत दिने कार्य जारी रहने बताए ।
सो अवसरमा वडा अध्यक्षहरु गोपी मण्डल, गुलाब प्रसाद सिंह, लक्ष्मी प्रसाद मण्डल तथा कृषकहरुको सहभागिता रहेको कृषि विकास शाखाप्रमुख उदयकान्त झाले जानकारी दिए ।
यस्तै मंगलबारै सप्तरीको बलानबिहुल र बोदेबरसाईन विभिन्न कार्यकम गरि १८ औ धान दिवस तथा रोपाई दिवस मनाईएको छ । बलान बिहुल गाउपालिका ५ स्थित रामनगरमा किसानहरूले धान रोपी, दही, च्युरा खाएर धान दिवस मनाईएका हुन् ।
सो अवसरमा बलान बिहुल गाउपालिका अध्यक्ष दयानन्द गोईतेले किसानलाई कृषि तर्फ आत्मनिर्भर बनाउनु पर्नेमा जोड दिए । कृषि ज्ञान केन्द्र र साना सहकारी संस्था लि. को संयोजनमा आयोजित कार्यक्रममा कृषि ज्ञान केन्द्र राजबिराजका प्रमुख राजेन्द्र प्रसाद यादबले कृषीलाई ब्यवसायीकरण गर्न सिचाईमा जोड दिनुपर्ने बताए ।
सप्तरीमा ६३ प्रतिशत खेती योग्य जमिन रहेकोले सिचाई अभावका कारण भएका सिचाई संरचनामा पानी नआउदाँ खेती हुन नसकेको उनको भनाई थियो ।
