काठमाडौं । केही दिनदेखिको अविरल वर्षासँगै आएको बाढी र पहिरोका कारण देशभरका विभिन्न सडकखण्ड अवरुद्ध हुन पुगेका छन् । एक महिनाको अवधिमा मात्र सय बढी स्थानमा सडकमा क्षति पुगेको छ । जसमध्ये आधा दर्जन बढी स्थानमा अहिले पनि सडक अवरुद्ध छ ।
सडक विभागले वर्षा जारी रहेकाले विभिन्न ठाउँमा सडक अवरुद्ध हुने र खुलाउने काम जारी रहेको जनाएको छ । अविरल वर्षापछिको बाढीले अवरुद्ध सडक खुलाउन सडक विभागअन्तर्गतको विभिन्न निकायका साथै प्रहरी प्रशासनले निरन्तर काम गर्दै आएका छन् ।
कतिपय स्थानका सडकमा गम्भीर रूपमा क्षति पुगेको स्थानमा वैकल्पिक माध्यमको प्रयोग गरेर सवारी आवागमन सुचारु गर्ने काम भइरहेको विभागले जनाएको छ भने सामान्य क्षति पुगेको स्थानमा तत्काल मर्मतसम्भार गरेर सडक सुचारु गरिएका छन् ।
सडक विभागका अनुसार वर्षापछिको एक महिनाको अवधिमा अवरुद्ध सडकमध्ये ५७ स्थानमा एकतर्फी चालू रहेको २९ स्थानमा दुवैतर्फ सडक आवागमन सुचारु छ ।
सडक डिभिजन हेटौंडाअन्तर्गत मकवानपुरको लामीडाँडा–सिमभन्ज्याङमा अवरुद्ध सडक खुल्न सकेको छैन । कान्ति राजमार्गअन्तर्गत मकवानपुरको बगुवा र जीतपुरमा पनि सडक अवरुद्ध हुन पुगेको छ ।
नारायणघाट बुटवल सडक योजनाअन्तर्गत नवलपुरको थुम्सी र पितौजी तथा सडक डिभिजन, दमौलीअन्तर्गतको तनहुँको भन्सारमा पनि सडक अवरुद्ध हुन पुगेको छ ।
सडक डिभिजन, हेटौंडाअन्तर्गत मकवानपुरको लामीडाँडा सिमभन्ज्याङमा दुवैतर्फ सवारी सुचारु भएको छ । बीपी राजमार्गअन्तर्गत सिन्धुलीको कमेरे फाट, काभ्रेपलाञ्चोकको माम्तिा खोला र त्रिभुवन राजमार्गअन्तर्गत धादिङको नौबिसे दामेचोमा पनि एकतर्फी रूपमा सवारी सुचारु भएको छ ।
त्रिभुवन राजमार्गअन्तर्गत धादिङको विशालटारमा अवरुद्ध सडक पनि दुवैतर्फी रूपमा खुलेको छ । मकवानपुरको बगधोरा, भैंसेदेखि चुनियसडक खण्ड, नारायणघाट, मुग्लिन सडकअन्तर्गत चितवनको ४ किलो, १४ किलो र २० किलोमा पनि एकतर्फी सवारी खुलेको छ ।