रुकुम पूर्व । रुकुम पूर्वमा पुनः हिमपात भएपछि जनजीवन प्रभावित भएको छ । पहिले परेको हिउँ पूर्ण रूपमा बिलाउन नपाउँदै बिहीबार रातिदेखि पुनः हिमपात भएको हो । हिमपातले लेकाली बस्ती सेताम्य भएको छ । हिमपातसँगै अत्यधिक चिसो बढेको छ ।
पटकपटक हिमपात भएपछि बाली सप्रिने आशाले किसान भने खुसी भएका छन् । पुसमा बाक्लो हिउँ परेपछि अन्नबाली, फलफूल, जडीबुटी सप्रिने किसानको भनाइ छ । बाक्लो हिमपातका कारण यातायात सेवा अवरुद्ध भएको छ । सदरमुकाम रहेको रुकुमकोटदेखि पुथाउत्तरगंगा गाउँपालिका जाने सहिदमार्गमा बाक्लो हिउँ जमेकाले सडक अवरुद्ध भएको छ ।
यसैगरी, रुकुमकोटदेखि बाग्लुङ भएर काठमाडौं जाने मध्यपहाडी लोकमार्ग पनि अवरुद्ध भएको पूर्वी यातायात प्रालिका इन्चार्ज सनम गौतमले बताए । यसअघि परेको हिउँ पन्छाएर सडक सञ्चालन भएको केही दिन मात्र भएको थियो । हिउँ अहिले पनि परिरहेकाले जनजीवन अस्तव्यस्त भएकोे छ । वस्तुभाउलाई गोठमै राखिएको छ । सर्वसाधरण घरभित्र आगो तापेर बसिरहेको पुथाउत्तरगंगा गाउँपालिका–१२ कोलकाबहादुर विकले बताए ।
