पाल्पा । पाल्पाको एक स्थानीय तहमा प्रमुख पदमा महिलाहरूबीच प्रतिस्पर्धा हुने भएको छ । वडा अध्यक्षमा समेत महिला उम्मेदवार न्यून भएको बेला बगनासकाली गाउँपालिकाले महिला प्रमुख पाउने सुनिश्चित भएको हो ।
नेकपा एमालेबाट निवर्तमान उपाध्यक्ष सरस्वती चिदी दर्लामी र गठबन्धबाट नेपाली काँग्रेसकी सचिव सुनिता अधिकारीबीच प्रतिस्पर्धा हुदैछ । त्यस्तै पत्रकार अम्बिका पाण्डेले स्वतन्त्र र जनता समाजवादीबाट मिना कुमारी गाहाले पनि अध्यक्षको उम्मेदवारी दिएका छन् ।
गाउँपालिकाको अध्यक्ष पदमा ४ जनाको उम्मेदवारी दिएपनि मुख्य प्रतिष्पर्धा भने एमाले र गठवन्धनकी उम्मेदवार अधिकारी बीच देखिएको छ । उपाध्यक्ष भई काम गरेको अनुभवले सुखी जनता र सम्बृद्ध बगनासका निर्माणको लागि उम्मेदवार बनेको सरस्वती चिदीले बताइन् ।
उम्मेदवारहरूले घरदैलो गर्ने, कोणसभा र भेला गरेर प्रचारप्रसारलाई तिब्र बनाएका छन् । विद्यार्थी राजनितिबाट राजनिती सुरु गरेकी गठवन्धनकी उम्मेदवार सुनिता अधिकारीले बगनासकालीको दिगो विकास, शिक्षा, स्वास्थ्य रोजगार, कृषि पशुपालन तथा सिंचाई सुविधान विस्तार गर्न उम्मेदवार बनेको बताइन् । बगनासकालीमा १९ हजार ८ सय ३९ मतदाता रहेका छन् । पालिका भित्र ११ मतदान स्थलमा २२ वटा मतदान केन्द्र रहेका छन् ।
