जनकपुरधाम । जनकपुरधाममा एक सातादेखि हराइरहेका एक बालक मृत अवस्थामा फेला परेका छन् ।
जेठ १७ गतेदेखि हराइरहेका सर्लाहीको कबिलासी नगरपालिका–७ गैर बजार घर भई हाल जनकपुरधाम उपमहानगरपालिका–८ मा टेन्टमा बस्दै आएका जियासरण बरहीका ६ वर्षीय छोरा राँकी बरही मृत अवस्थामा फेला परेका हुन् ।
बालक बरहीको शव जनकपुरधाम उपमहानगरपालिका–२२ र महोत्तरीको पिपरा गाउँपालिका–६ को सिमानामा पर्ने वसविट्टीस्थित दुधमती नदीको छेउको पानी भएको झाडीमा फेला परेको प्रहरीले जनाएको छ ।
जिल्ला प्रहरी कार्यालय धनुषाका प्रहरी नायव उपरीक्षक प्रदीपबहादुर क्षेत्रीले बालकको शव सडेको अवस्थामा फेला परेको जानकारी दिएका । हराएकै दिन कसैले उनको हत्या गरेर शव फालेको हुन सक्ने प्रहरीको आशंका छ ।
मृतक बालकको शवलाई पोष्टमार्टमका लागि प्रादेशिक अस्पताल जनकपुर राखिएको र घटनाका विषयमा अनुसन्धान भइरहेको प्रहरी नायब उपरीक्षक क्षेत्रीले जानकारी दिए ।
सर्लाहीको कविलासी नगरपालिका–७ घर भएका घुमन्ते समुदायका बालक बरहीको परिवार केही दिनयता जनकपुरधाम उपमहानगरपालिका–८ मा त्रिपाल टाँगेर बस्दै आएका थिए ।
गत जेठ १७ गते एक अपरिचित व्यक्तिले बालकलाई बेपत्ता बनाएको भन्दै परिवारका सदस्यले बलवा प्रहरीमा जानकारी गराउँदै खोजबिनका लागि आग्रह गरेका थिए ।
