सीमा नाका नखोलिने, जुन देशमा अलपत्र छन् त्यहीँको सरकारले व्यवस्थापन गर्नुपर्ने

काठमाडौं । सरकारले लकडाउनको बेला बन्द भएको सीमानाका नखोल्ने जनाएको छ । भारतबाट नेपाल प्रवेश गर्न खोज्नेहरु सीमा नाकामै अलपत्र परिरहेका बेला सरकारले सीमानाका बन्द रहने जनाएको छ ।

प्रधानमन्त्री केपी शर्मा ओलीका परराष्ट्र सल्लाहकार डा. राजन भट्टराईले लकडाउनका बेला सीमानाका नखोलिने बताए । सरकारले कुटनीतिक पहल गरेर जुन व्यक्ति जुन देशमा छन् सोही देशको सरकारले उनीहरुको व्यवस्थापन गर्ने सहमति गरेको छ ।

‘कुटनीतिक पहल गरेर सरकार लकडाउनको बेला सीमानाका नखोल्ने निष्कर्षमा पुगेको हो,’ भट्टराईले भने, ‘भारतमा हुने नेपालीको भारत सरकारले र नेपालमा हुने भारतीयको नेपाल सरकारले नै व्यवस्थापन गर्ने सहमति भएको छ ।’

यसअघि कोरोना भाइरस रोकथाम तथा नियन्त्रण उच्चस्तरीय समन्वय समितिले सीमामा आवतजावत बन्द गरिएपछि नेपाल–भारत नाकामा अलपत्र परेका नेपालीलाई एक पटकका लागि देशभित्र प्रवेश गर्न दिने निर्णय गरेको छ ।

सोहीअनुसार ११ चैतमा एक पटकका लागि सीमानाकामा रहेका नेपाली नेपाल प्रवेश गरेका थिए । तर अझै हजारौं नेपाली सीमानाकामै अलपत्र परेका छन् । अलपत्र परेका ती नेपालीलाई सीमानामै राख्ने र उनीहरुको खानपानलगायतको व्यवस्थापन गरिने सरकारको तयारी रहेको छ ।

लकडाउनका बेला सीमानाका नखोल्ने प्रधानमन्त्री स्तरबाट भएको निर्णय अनुसार अब नेपालमा रहेका भारतीयको नेपाल सरकारले सम्पुर्ण व्यवस्थापन गर्नेछ । त्यस्तै भारतमा रहेका नेपालीको खानपानलगायत सम्पूर्ण कुराको व्यवस्थापन भारतीय सरकारले गर्ने बताइएको छ ।

नेपाल प्रवेश गर्न खोज्ने नेपाली र सुरक्षाकर्मी बीच यसअघि झडप समेत भएकाले सरकारले एक पटकका लागि नेपाल प्रवेश गराएको थियो । त्यसरी प्रवेश गर्ने नेपाली अनिवार्य रुपमा १४ दिनसम्म क्वारेन्टाइनमा बस्ने व्यवस्थाअनुसार उनीहरु अहिले क्वारेन्टाइनमै रहेका शिक्षामन्त्री गिरिराजमणी पोखरेलले बताए ।

नेपालको पूर्व र पश्चिमका नाकामा कतिपय नेपाली भारतबाट फर्किन खोज्दा अलपत्र परे पनि उनीहरुका लागि सीमानाकामै खानपानसहितको व्यवस्थापन गरिने भएको छ ।

पश्चिमी नेपालको सीमानाकामा रहेका नेपालीहरुको खानपानलगायतको व्यवस्थापन भारतीय सरकारले गरिरहेको र अन्यत्र पनि सोहीअनुसार व्यवस्थापन गरिने भट्टराईले जनाए ।
कोरोना भाइरसको संक्रमण फैलिन नदिने उद्धेश्यले नेपाल सरकारले २५ चैतसम्म लकडाउन गरेको छ । विश्वभरी महामारीको रुपमा फैलिएको कोरोना भाइरसविरुद्ध लडनका लागि विभिन्न देशका सरकार जुटेका छन् । नेपाल, भारतसहित विभिन्न देशमा अहिले लकडाउन गरिएको छ ।