लमजुङ । लमजुङ जिल्लाको मस्र्याङ्दी गाउँपालिका–७ को ङादी नजिकै बालुवा पहिरोमा खसेको बस निकालिएको छ । सो बसका चालक भने फेला परेका छैनन् । उनको मोबाइल र चप्पल गाडी खसेकै ठाउँमा फेला परेको प्रहरीले आइतबार जनाएको छ ।
सो बस शनिबार राति खसेको आँकलन गरिएको छ । सो बसका चालक ४० वर्षीय खेमबहादुर भुजेल रहेको तर बसमा यात्रु नभएको बताइएको छ ।
बेसीसहर–ङादी रुटमा चल्ने ध१ख ३७२ नम्बरको बस बिग्रिएको भन्दै श्रीमानले फोनमा जानकारी गराएको चालककी श्रीमती कमला तामाङले बताइन् ।
राति करिब साढे १२ बजे बस बिग्रिएको हुँदा बनाएर आउँदै छु भन्दै चालक भुजेलले आफूलाई फोनमा बताएको उनकी श्रीमती कमला तामाङले बताएको सोही गाउँपालिका– ३ स्थित खुदी प्रहरी चौकीका प्रमुख सहायक प्रहरी निरीक्षक प्रेमप्रसाद शर्माले बताए । उनका अनुसार पहिले पहिले पनि कहिलेकाँही आउँछु भन्ने र नआउने गरेको हुँदा रातमा खोजी नगरेको श्रीमतीको भनाइ छ । बिहान स्थानीयले नदीमा गाडी डुबेको देखेपछि खोजतलासको काम भइरहेको प्रहरी भनाइ छ । नदीमा डुबिरहेको बस सडक किनारमा ल्याइएको छ ।
खुदी प्रहरी चौकीका प्रमुख प्रहरी सहायक निरीक्षक शर्माका अनुसार चालकको मोबाइल र चप्पल बस खसेकै स्थानमा भेटिए पनि उनलाई फेला पार्न सकिएको छैन । उनले भने, ‘चालकले कहिलेकाहीं श्रीमतीलाई गाडी खोलामा फालेर बेपत्ता भइदिन्छु भन्ने धम्की दिने गरेका रहेछन्, उनी फेला पर्छन् कि भन्ने आधार त्यही मात्रै हो ।’
