बैतडी । बैतडीको खोड्पे बजारको सरसफाई अभियान सुरु गरिएको छ । शनिबार बजार क्षेत्रको सरसफाई गर्दै अभियानको सुरु गरिएको पाटन नगरपालिका ८ का वडाअध्यक्ष हरिश बिष्टले जानकारी दिए ।
सरसफाई अभियान अन्तरगत बजारमा रहेको फोहोरमैला उठाएर डम्पीङ साइडमा फालिएको छ भने, पसलहरु पछाडीको फोहोर र झाडीहरु सफा गरिएको छ ।
सरसफाई कार्यमा जनप्रतिनिधि, व्यापारी, खोड्पे बजार व्यवस्थापन समिति, खोड्पे स्पोर्टस क्लव, फोर्स नेपालका पदाधिकारी, सुरक्षाकर्मि र स्थानियहरुले अभियानको सुरु गर्दै खोड्पे बजार क्षेत्रको सरसफाई गरेका हुन् ।
बैतडीसहित बझाङ र दार्चुलाको जक्नसनको रुपमा रहेको खोड्पे बजारको सरसफाई गरिएको वडाअध्यक्ष बिष्टले जानकारी दिए । यस्तै प्रत्येक महिनाको अन्तिम हप्तामा बजार क्षेत्रमा सरसफाइ अभियान सञ्चालन गर्ने निर्णय समेत गरिएको छ ।
खोड्पे बजारको सरसफाई संगै व्यवसाय सञ्चालन गर्दै आएका व्यवसायिहरुलाई आआफ्नो पसलबाट निस्कने फोहरलाई उचित व्यवस्थापन गरि बजार क्षेत्रलाई सफा राख्ने निर्णय गरिएको स्पोट्स क्लवका अध्यक्ष सन्तोश राईले बताए ।
