काठमाडौं । राज्यका तीनवटै अंग कार्यपालिका, न्यायपालिका र व्यवस्थापिकाको भौतिक संरचना र प्रणाली जलेर खरानी भएपछि मध्यरातबाट नेपाली सेनाले सुरक्षा कमान्ड सम्हालेको छ । प्रधानसेनापति अशोकराज सिग्देलले भिडियो सन्देशमार्फत शान्ति सुव्यवस्था कायम गर्न सेना प्रतिबद्ध रहेको बताएलगत्तै जंगी अड्डाले विज्ञप्तिमार्फत मध्यरातबाट सुरक्षा कमान्ड सम्हालेको घोषणा गरेको हो ।

यस घोषणासँगै पशुपतिनाथ मन्दिरसहित संवेदनशील निकायमा सुरक्षा पहरा थालेको छ । सेनाले सुरक्षा कमान्डसँगै आन्दोलनकारीसँग वार्ता र संवादको प्रयास पनि सँगसँगै अघि बढाएको छ । राष्ट्रपति रामचन्द्र पौडेलले आन्दोलनरत ‘जेनजी’लाई वार्ताका लागि आह्वान गरेपछि सेनाले वार्तासँगै सुरक्षालगायतको कमान्ड सम्हालेको हो । सेनाले विज्ञप्तिमार्फत राति १० बजेपछि सुरक्षा स्थिति नियन्त्रणमा दृढता रहने प्रतिबद्धता जनाएलगत्तै मध्यरातबाट सेना फिल्डमा उत्रिएका हुन् ।

राज्यका तीन अंग खरानी, सेनाले सम्हाल्यो सुरक्षा कमान्ड

राष्ट्रपतिले वार्ताको आह्वान गरेसँगै काठमाडौ ं महानगरपालिकाका मेयर बालेन शाहले जेनजी पुस्ताका तर्फबाट वार्ताको सहजीकरण थालेका छन् । आन्दोलन उग्र बन्दै गएपछि प्रधानमन्त्री केपी शर्मा ओलीले राजीनामा घोषणा गर्दै बालुवाटारबाट सेनाको हेलिकोप्टर चढेर बाहिरिएपछि राष्ट्रपतिले वार्ता आह्वान गरेका हुन् । वार्ता आह्वान गरे पनि आन्दोलनकारी जेनजीका तर्फबाट वार्तामा कसलाई सहभागी गराउने भन्नेमा भने अन्योल छ । आन्दोलनको संयोजन घोषित र औपचारिक रूपमा कुनै व्यक्तिका तर्फबाट नभएका कारण कसलाई संयोजनका लागि अघि सार्ने भन्ने अन्योल छ ।

तर, महानगरका प्रमुख बालेनले भने सामाजिक सञ्जालमार्फत संसद् विघटनको सर्त अघि सार्दै वार्ता अघि संसद् विघटन भएको हुनुपर्ने सर्त राखेका थिए । काठमाडौ ं उपत्यकाका सार्वजनिक र सरकारी सम्पदासहित पवित्र पाशुपत क्षेत्रमा समेत आक्रमण भएपछि नेपाली सेनाले लिखित मन्तव्यमार्फत संयम रहन अपिल गरेको छ । प्रधानसेनापति अशोकराज सिग्देलले नेपाली सेनाको फेसबुक पेजमार्फत सम्बोधन गर्दै सार्वजनिक सम्पत्ति र सम्पदाको सुरक्षा गर्न सेना कटिबद्ध रहेको बताएका छन् ।

नेपाली सेनाले ‘टेकओभर’ कतिपयको आशंका र विश्वासबीच सेनाले मध्यरातसम्म आफू परिचालित भएको कुनै संकेत गरेको छैन । तर, भिडियो सन्देशमार्फत नेपाली सेना राष्ट्रिय सम्पदा ऐतिहासिक सम्पदालगायतलाई बचाई राष्ट्रको सर्वो परि हितको रक्षा गर्न प्रतिबद्ध रहेको भन्दै यसलाई आफ्नो कर्तव्य भएको भनेको छ । सेनाले आन्दोलनरत समूहलाई आगजनी र आन्दोलन छाड्न आह्वानसमेत गरेको छ सेनाले आन्दोलनका क्रममा हुन पुगेको जनधन क्षतिप्रति गहिरो दुःख प्रकट गर्दै शोक सन्तप्त परिवारप्रति समवेदना व्यक्त गरेको जनाएको छ ।

‘हालसम्म धेरै जनधनको क्षति भइसक्यो, थप जनधनको क्षति हुन नदिन र शान्ति एकता र सद्भाव कायम गर्न ‘ हाम्रो दायित्व हो,’ प्रधानसेनापति सिग्देलले भनेका छन् । सेनाले यसअघि लिखित वक्तव्य जारी गर्दै जेनजी पुस्तालाई संयम हुन आग्रह गरेको थियो । आन्दोलनलाई नजिकबाट नियालिरहेको भन्दै सेनाले नेपाल र नेपालीको जिउधनको रक्षा गर्न प्रतिबद्ध रहेको जनाएको छ । सेनाले परिस्थितिलाई थप जटिल हुन नदिन, सामाजिक सद्भाव र एकता कायम राख्दै संयमित हुन अनुरोध पनि गरेको छ ।

भ्रष्टाचार र कुशासनविरुद्ध जेनजी पुस्ताले सुरु गरेको विद्रोहको दोस्रो दिन विद्रोहले अराजक रूप लिएपछि प्रधानमन्त्री केपी शर्मा ओली राजीनामा दिएर भागेका छन् । निवासमा आगजनीपछि राष्ट्रपति रामचन्द्र पौडेलले पनि शीतलनिवास छाडेका छन् । राजीनामा दिएका ओली र राष्ट्रपति रामचन्द्र पौडेललाई नेपाली सेनाले शिवपुरीस्थित ब्यारेकमा राखेको छ भने क्वार्टरमा बसेका मन्त्री र मुख्यमन्त्रीलाई सेनाको हेलिकोप्टरले नेताको हाल: कोही भागे कोही लखेटिए उद्धार गरी विभिन्न ब्यारेकमा लगेर राखेको छ ।

आन्दोलन उग्र बन्दै गएपछि मंगलबार कालिमाटीमा दुई जना प्रदर्शनकारीको मृत्यु भएको छ भने कोटेश्वरमा तीन जना प्रहरीले ज्यान गुमाएका छन् । उपत्यकाभित्रका सबै प्रहरी कार्यालय जलेर खरानी भएका छन् । प्रहरी कार्यालयका कतिपय हतियार लुटिएका छन् भने अधिकांश जलेर खरानी भएका छन् । सिंहदरबारभित्रका अधिकांश मन्त्रालय, नेपाल टेलिभिजनको कार्यालयसहित सबै जलेका छन् भने बानेश्वर स्थित सम्मेलनकेन्द्र र सर्वो च्च अदालत पनि आन्दोलनकारीले जलाइदिएका छन् ।

उता, अख्तियार दुरुपयोग अनुसन्धान आयोगदेखि सबैजसो संवैधानिक निकाय र सरकारी कार्यालय जलेका छन् । चार जना पूर्वप्रधानन्यायाधीशसहितका नागरिक अगुवाहरूले पनि जेनजीलाई संयमता अपनाउन अपिल गरेका छन् । पूर्वप्रधानन्यायाधीश मीनबहादुर रायमाझी, अनुपराज शर्मा, कल्याण श्रेष्ठ, सुशीला कार्कीसहित मानवअधिकारकर्मी र प्राध्यापकका तर्फबाट संयुक्त अपिल जारी गरी तोडफोड र आगजनी छाडेर संवादमा आउन भनिएको छ ।

उता, नक्खु कारागारमा रहेका रास्वपा सभापति रवि लामिछानेसहित कैदीबन्दी स्वतःस्फूर्त रूपमा निस्किएपछि जेल खाली भएको छ । देशभरका धेरैजसो कारागारबाट कैदीबन्दी भागेका छन् ।

सम्बन्धित समाचार

मन्त्रीले नटेरेपछि सरकारबाट बाहिरिँदै दुई दल ओली चीन उडेकै दिन विद्यालाई ५१ किलोको मालाले स्वागत वाम राजनीतिमा नयाँ ‘डिपार्चर’ नागरिक आन्दोलनका फेरिँदा रूप: मध्यरातका पर्चादेखि ‘जेनजेड’को ‘नेपो बेबी’ ह्यासट्यागसम्म काठमाडौंको बानेश्वर क्षेत्रमा कर्फ्यु आदेश जारी शीतलनिवास, सिंहदरबार, नारायणहिटीलगायतका मुख्य क्षेत्रमा थपियो कर्फ्यु प्रहरीले चलाएको गोली लागेर एक जेन्जीको निधन कर्फ्यु लगाए पनि बानेश्वरमा सुरु भयो जेनजीको प्रदर्शन