रौतहट । राष्ट्रिय स्वतन्त्र पार्टी (रास्वपा) रौतहटको कटहरिया नगरपालिकामा आगामी निर्वाचनका लागि उम्मेदवार छनोटको विषयलाई लिएर आन्तरिक विवाद चर्किएको छ । रास्वपा कटहरिया नगरपालिकाका नगर सभापति भिखारी पण्डितले पार्टीले आफूहरूले भनेबमोजिम टिकट नदिए चुनावमा अर्को दललाई जिताउन लाग्ने खुला चेतावनी दिएका छन् ।

रास्वपा रौतहट–३ का सांसद रविन्द्र पटेलको निर्देशनमा उम्मेदवारहरूको नाम टुंगो लगाइएको छ । नगर सभापति पण्डितद्वारा हस्ताक्षरित एक पत्र सार्वजनिक भएसँगै रास्वपाभित्रको यो विवाद सडकमा आएको हो । सांसद पटेलको निर्देशनमा सिफारिस भएको उम्मेदवारलाई पार्टीले टिकट नदिए निर्वाचनमा अर्को दलका उम्मेदवारलाई बिजयी गराउँने खुल्ला चेतावनी समेत दिइएको छ ।

सार्वजनिक पत्रअनुसार कटहरिया नगरपालिकाको मेयर पदमा रास्वपाबाट स्वयं नगर सभापति भिखारी पण्डितलाई उम्मेदवार बनाउने निर्णय गरिएको छ । त्यसैगरी, मधेश प्रदेश सभाका लागि मधेश प्रदेश कमिटी सदस्य राकेश दासलाई उम्मेदवार बनाउने निर्णय भएको पत्रमा उल्लेख छ ।

पत्रमा चुनावी रणनीति र उम्मेदवारको नाम सिफारिस मात्र गरिएको छैन, पार्टी नेतृत्वलाई सिधै चेतावनी समेत दिइएको छ । नगर सभापति पण्डितले पत्रमा लेखेका छन्, ‘यदि राष्ट्रिय स्वतन्त्र पार्टीले मेयरको टिकट भिखारी पण्डित र विधायकको टिकट राकेश दासलाई नदिएमा अर्को दललाई चुनाव जिताउन लाग्ने जानकारी गराउन चाहन्छु ।’

२०८४ को वैशाख, जेठमा पालिका र प्रदेश सभाको निर्वाचन गर्ने तयारी प्रधानमन्त्री वालेन्द्र शाह (वालेन) नेतृत्वको सरकारले गरेको छ । तर निर्वाचनको मिति घोषणाा नहुँदै रास्वपाका नगर सभापतिले नै पार्टी नेतृत्वलाई यसरी दबाब दिँदै अन्तर्घात गर्ने धम्कीपूर्ण पत्र लेखेपछि रौतहट रास्वपामा तरंग पैदा भएको छ ।

पार्टी केन्द्रले तल्लो तहका कमिटीहरूलाई उम्मेदवार सिफारिस वा छनोटको कार्यमा नगर्न र आफूखुशी उम्मेदवार घोषणा नगर्न स्पष्ट निर्देशन यसअघि दिइसकेको छ । तर रौतहटमा रास्वपा सांसद रविन्द्र पटेलकै निर्देशनमा विभिन्न पालिकामा अहिले उम्मेदवार छनोट गर्दै टुंगो लगाउँने काम भइरहेको छ । रौतहटको कटहरिया नगरपालिकामा केन्द्रको निर्देशन खुला रुपमा उल्लंघन गर्दै टिकटका लागि दबाब दिइएको छ ।

रास्वपा सांसद पटेलको निर्देशनमा कटहरिया नगरपालिकाका नगर सभापति पण्डितले पार्टीको निर्देशन र स्थापित पद्धति विपरीत उम्मेदवारको नाम घोषणा मात्र गरेका छैनन्, आफूहरूले भनेबमोजिम नभए चुनावमा अर्को दललाई जिताउनेसम्मको खुला चेतावनी दिएका छन् ।

रास्वपाले टिकट वितरणमा पुरानो राजनीतिक अभ्यास तोड्दै नयाँ प्रणाली अपनाउने घोषणा गरिरहँदा स्थानीय तहबाट आएको यो धम्कीपूर्ण पत्रले पार्टीभित्र खैलाबैला मच्चाएको छ ।

केन्द्रको ‘उम्मेदवार सिफारिसको काममा नलाग्नू’ भन्ने स्पष्ट निर्देशनलाई लत्याउँदै पार्टी हितविपरीत अन्तर्घातको धम्की आएपछि रौतहट रास्वपामा आन्तरिक द्वन्द्व थप उत्कर्षमा पुगेको छ । यस अनुशासनहीन कदम र निर्देशन उल्लंघनको विषयमा रास्वपाको केन्द्रीय अनुशासन आयोगले चाल्ने कदमलाई चासोका साथ हेरिएको छ ।

सम्बन्धित समाचार

मौलापुरमा तत्काल विजुली, पानीको भुक्तानी गर्न सरकारको नाममा सर्वोच्च अदालतको अन्तरिम आदेश मौलापुरको बजेट फ्रिज गराउने षडयन्त्रमा लागेको छ : मेयर रिना साह ४३ देशका लागि संसदीय मैत्री समूह गठन (सूचिसहित) रास्वपाका नवनिर्वाचित केन्द्रीय सदस्यको शपथ ग्रहण बुधबार रास्वपा केन्द्रीय समिति सदस्य हेरफेर राष्ट्रपतिले संविधानको रक्षा गर्न सक्नुभएन, तत्काल राजीनामा दिँदा देशको भलो हुन्छ : प्रभु साह कर्णाली दुर्घटनाको विषयमा रास्वपाकै सांसदले मागे गृहमन्त्रीसँग जवाफ देउवा पुत्र जयबीरलाई ७ दिनभित्र उपस्थित हुन सम्पत्ति शुद्धीकरणको सूचना