सुन्दरहरैंचा (मोरङ) । आदिकवि भानुभक्त आचार्यको २१३औँ जन्मजयन्तीको अवसरमा मोरङको सुन्दरहरैंचा–५, स्थित तीनपैनीमा रहेको भानु साझा पुस्तकालय द्वारा पुस्तकालय भवनको दोस्रो तला उद्घाटन तथा साहित्यिक रचना वाचन कार्यक्रम भव्य रूपमा सम्पन्न गरिएको छ।

साहित्यिक रचना वाचनसहित भव्य कार्यक्रम सम्पन्न

भानु साझा पुस्तकालयका अध्यक्ष पुरन याक्खाको अध्यक्षतामा सम्पन्न कार्यक्रममा सुन्दरहरैंचा नगरपालिकाका नगर प्रमुख केदार प्रसाद गुरागाईं प्रमुख अतिथि तथा वरिष्ठ कवि मनु मञ्जिल विशिष्ट अतिथिका रूपमा सहभागी भएका थिए। कार्यक्रममा साहित्यकार, शिक्षाविद्, जनप्रतिनिधि, बुद्धिजीवी, विद्यार्थी तथा स्थानीय साहित्यप्रेमीहरूको उल्लेखनीय उपस्थिति रहेको थियो।

प्रमुख अतिथि नगर प्रमुख केदार प्रसाद गुरागाईंले पुस्तकालयहरू समाजका बौद्धिक केन्द्र भएको उल्लेख गर्दै ज्ञान, शिक्षा र संस्कृतिको संरक्षणमा यस्ता संस्थाको भूमिका अत्यन्त महत्वपूर्ण रहेको बताए। उनले सुन्दरहरैंचा नगरपालिकाले शिक्षा, साहित्य र संस्कृतिको प्रवर्द्धन गर्ने संस्थाहरूलाई आवश्यक सहयोग गर्दै जाने प्रतिबद्धता व्यक्त गरे। नगर प्रमुख गुरागाईंले नयाँ पुस्तामा पुस्तक पढ्ने संस्कार विकास गर्न सबैले सामूहिक प्रयास गर्नुपर्ने धारणा पनि राखे।

विशिष्ट अतिथि कवि मनु मञ्जिलले आदिकवि भानुभक्त आचार्य नेपाली भाषा र साहित्यका अमर व्यक्तित्व भएको उल्लेख गर्दै उनको योगदानलाई पुस्तान्तरण गर्न यस्ता कार्यक्रमहरू प्रभावकारी माध्यम बन्ने बताए। उनले साहित्यले समाजलाई सचेत, सभ्य र सिर्जनशील बनाउने भएकाले पुस्तकालयहरूलाई नियमित साहित्यिक गतिविधिको केन्द्रका रूपमा विकास गर्नुपर्नेमा जोड दिए।

कार्यक्रमलाई सम्बोधन गर्दै अध्यक्ष पुरन याक्खाले भानु साझा पुस्तकालयले विगतदेखि नै समाजमा पठन–पाठन, भाषा, साहित्य र संस्कृतिको संरक्षणमा निरन्तर योगदान दिँदै आएको उल्लेख गरे। उनले पुस्तकालयको दोस्रो तला निर्माणसँगै अध्ययन, अनुसन्धान तथा साहित्यिक गतिविधिलाई अझ प्रभावकारी रूपमा अगाडि बढाइने विश्वास व्यक्त गर्दै पुस्तकालयको विकासमा सहयोग गर्ने सम्पूर्ण व्यक्ति तथा संस्थाप्रति आभार व्यक्त गरे।

कार्यक्रमको अर्को आकर्षण साहित्यिक रचना वाचन रहेको थियो। यस क्रममा रूप नारायण श्रेष्ठ सहित विभिन्न कवि तथा साहित्यकारहरूले कविता, गजल, मुक्तक तथा अन्य सिर्जनात्मक रचनाहरू वाचन गरेका थिए। साहित्यप्रेमीहरूको उत्साहजनक सहभागिताले कार्यक्रमलाई थप गरिमामय बनाएको थियो।

कार्यक्रमको सहजीकरण भानु साझा पुस्तकालयका साहित्य सचिव गीत प्रसाद श्रेष्ठ ले गरेका थिए। उनले कार्यक्रमलाई व्यवस्थित र प्रभावकारी रूपमा सञ्चालन गर्दै अतिथि, साहित्यकार तथा उपस्थित सम्पूर्ण महानुभावप्रति धन्यवाद व्यक्त गरेका थिए।

आदिकवि भानुभक्त आचार्यको जन्मजयन्तीको अवसरमा आयोजित उक्त कार्यक्रमले नेपाली भाषा, साहित्य र संस्कृतिको संरक्षण तथा प्रवर्द्धनमा पुस्तकालयहरूको भूमिका अझ सशक्त रहेको सन्देश दिएको सहभागीहरूको भनाइ थियो। साथै, पुस्तकालय भवनको दोस्रो तला उद्घाटनसँगै आगामी दिनमा अध्ययन, अनुसन्धान तथा साहित्यिक गतिविधिहरूलाई थप विस्तार गर्न सहज हुने विश्वास व्यक्त गरिएको छ।

सम्बन्धित समाचार

कक्षाकोठाबाट खेतसम्म : विद्यार्थीलाई कृषिसँग जोड्दै हिमालय इङलिस स्कुल सुनसरीका निजी विद्यालयमा शैक्षिक सुधारको पहल साजिलाल माविको विव्यस गठनमा राजनीतिक गन्ध साजिलाल माविको अध्यक्ष चयन विवादमा धनकुटामा एकै दिन ७९५ किलोग्राम गाँजा बरामद, दुई जना पक्राउ ‘लार्भा खोज र नष्ट गर’ कार्यक्रम सञ्चालन गर्दै कामपा सङ्खुवासभाको चैनपुरमा ८ सय ६२ जग्गाधनीलाई लालपुर्जा वितरण मनसुनजन्य रोगको रोकथामका लागि ‘प्रतिकार्य अभियान’