काठमाडौं । परराष्ट्रमन्त्री शिशिर खनालले आर्थिक कूटनीतिलाई नेपालको परराष्ट्र नीतिको प्रमुख प्राथमिकताका रूपमा अघि बढाउँदै मानार्थ वाणिज्य दूतहरूलाई व्यापार, लगानी, पर्यटन तथा प्रविधि हस्तान्तरणका क्षेत्रमा थप सक्रिय र परिणाममुखी भूमिका निर्वाह गर्न आह्वान गरेका छन् ।

मानार्थ वाणिज्यदूत कोर–नेपालको १९औँ वार्षिक साधारणसभा तथा चार्टर दिवसका अवसरमा बिहीबार काठमाडौंमा आयोजित कार्यक्रममा सम्बोधन गर्दै मन्त्री खनालले नेपाल र विभिन्न मुलुकबीच आर्थिक साझेदारी विस्तार गर्न मानार्थ वाणिज्यदूतहरूको योगदान अझ प्रभावकारी हुनुपर्नेमा जोड दिए ।

नेपाल र सम्बन्धित मुलुकबीचको मित्रता तथा आर्थिक सम्बन्ध सुदृढ बनाउन मानार्थ वाणिज्य दूतहरूले निर्वाह गर्दै आएको भूमिकाको प्रशंसा गर्दै उनले विशेषगरी नेपाल र सम्बन्धित देशहरूबीच आर्थिक तथा व्यापारिक सम्बन्ध प्रवद्र्धन गर्न उनीहरूको भूमिका अत्यन्त महत्वपूर्ण रहेको बताए ।

उनले काठमाडौंमा आवासीय कूटनीतिक नियोग नभएका मुलुकहरूसँग नेपालको सम्बन्ध विस्तार गर्न मानार्थ वाणिज्य दूतहरूले महत्वपूर्ण सेतुको भूमिका निर्वाह गर्दै आएको उल्लेख गर्दै जनस्तर, व्यापार, संस्कृति तथा संस्थागत सम्बन्ध विस्तारमा उनीहरूको योगदान प्रशंसनीय रहेको बताए ।

परराष्ट्र मन्त्रालय मानार्थ वाणिज्य दूतहरूको कार्यसम्पादनलाई थप प्रभावकारी बनाउन आवश्यक सहजीकरण गर्न प्रतिबद्ध रहेको उल्लेख गर्दै मन्त्री खनालले मन्त्रालयले मानार्थ वाणिज्य दूतसम्बन्धी विद्यमान नियम, सुविधा तथा कार्यप्रणालीको समयानुकूल समीक्षा गर्दै राष्ट्रिय तथा अन्तर्राष्ट्रिय कानुनी व्यवस्था र प्रचलनअनुरूप सुधार गर्ने पहल गर्ने बताए ।

नेपालको समसामयिक राजनीतिक अवस्था’bout चर्चा गर्दै उनले पछिल्लो राजनीतिक परिवर्तनले देशमा राजनीतिक स्थायित्व, नीतिगत निरन्तरता तथा पूर्वानुमेयताको आधार निर्माण गरेको उल्लेख गरे । वर्तमान सरकार सुशासन र समावेशी आर्थिक विकासप्रति प्रतिबद्ध रहेको जनाउँदै उनले भ्रष्टाचार नियन्त्रणका लागि कानुनी तथा संस्थागत सुधारलाई प्राथमिकतामा राखिएको बताए ।

परराष्ट्र नीतिको मूल उद्देश्य स्पष्ट पार्दै मन्त्री खनालले नेपालको परराष्ट्र नीति राष्ट्रिय हितको प्रवद्र्धन गर्दै आर्थिक रूपान्तरण, लगानी आकर्षण, व्यापार विस्तार, नवप्रवर्तन प्रवद्र्धन तथा नागरिकका लागि अवसर सिर्जनामा केन्द्रित हुने बताए ।

उनले रणनीतिक साझेदारी विस्तार, प्रत्यक्ष वैदेशिक लगानी आकर्षित गर्ने, बजार पहुँच विस्तार गर्ने, प्रविधि साझेदारी प्रवद्र्धन गर्ने तथा पर्यटन र दिगो विकासलाई नेपालको अन्तर्राष्ट्रिय सम्बन्धका प्रमुख प्राथमिकताका रूपमा अघि बढाइएको बताए ,

आर्थिक कूटनीतिको सफल कार्यान्वयनमा मानार्थ वाणिज्यदूतहरूको भूमिका अझ महत्वपूर्ण बन्दै गएको उल्लेख गर्दै मन्त्री खनालले यी प्रयासहरूमा मानार्थ वाणिज्य दूतहरू अपरिहार्य साझेदार भएको र उनीहरूले आफ्नो व्यावसायिक सञ्जाल, स्थानीय बजारसम्बन्धी ज्ञान तथा सार्वजनिक र निजी क्षेत्रसँगको निकट सम्बन्धमार्फत व्यापार, लगानी, पर्यटन, शिक्षा तथा सांस्कृतिक आदान–प्रदानलाई प्रवद्र्धन गर्न सक्ने बताए ।

मन्त्री खनालले परम्परागत सम्बन्धलाई केवल औपचारिकतामा सीमित नराखी ठोस र मापनयोग्य उपलब्धिमा रूपान्तरण गर्नुपर्ने आवश्यकता औँल्याउँदै मानार्थ वाणिज्य दूतहरूका लागि तीनवटा प्राथमिकता अघि सारे । उनले प्रत्येक मानार्थ महावाणिज्यदूतले आफ्नो जिम्मेवारीअन्तर्गतको मुलुकका लागि पर्यटन, प्रविधि हस्तान्तरण, प्रत्यक्ष वैदेशिक लगानी, नवीकरणीय ऊर्जा तथा व्यापार सहजीकरणलगायतका क्षेत्रमा केन्द्रित देश–विशिष्ट रणनीतिक कार्ययोजना तयार गर्नुपर्ने बताए ।

उनले शिक्षा, संस्कृति तथा युवाबीचको आदान–प्रदान विस्तार गरी जनस्तरको सम्बन्धलाई थप सुदृढ बनाउन पनि मानार्थ वाणिज्य दूतहरूलाई आग्रह गरे । साथै विदेशस्थित नेपाली नियोग, विदेशमा रहेका नेपाली मानार्थ वाणिज्यदूत, नेपालका लागि मान्यता प्राप्त विदेशी नियोग तथा काठमाडौंस्थित विदेशी मानार्थ वाणिज्य दूतहरूले निजी क्षेत्रबीचको सहकार्य विस्तार गरी पारस्परिक लाभदायी आर्थिक साझेदारीलाई अझ सशक्त बनाउन सक्ने विश्वास व्यक्त गरे ।

सम्बन्धित समाचार

अर्घाखाँचीका वनक्षेत्रमा रिचार्ज पोखरी निर्माण मिडियाको कार्यालयअघि गाडी तेर्स्याइएको विषयमा रास्वपाले के भन्यो ? मन लोभ्याउँदै जखेराको मनमोहक दृश्य अल्पमतका मुख्यमन्त्री शाहका निर्णायक २७ दिन यस्तो छ आजका लागि कृषिउपजको थोक मूल्य अतिक्रमित वनक्षेत्रको संरचना हटाइयो कीर्तिपुरमा गुडिरहेको कारमा आगलागी, गाडीभित्रै डढेर चालकको मृत्यु अनधिकृतरूपमा सीप परीक्षण र प्रमाणीकरण गर्ने संस्थाको कार्यालयमा सिलबन्दी