इलाम । सडकको बीचमा पहिरो । पहिरोको छेउमा एम्बुलेन्स रोकिएकोे छ, अर्कोतिर अस्पताल पुग्न छट्पटाइरहेको बिरामी । बीचमा सडक छैन । छ त केवल जोखिम । यो दृश्य कुनै दुर्गम हिमाली बस्तीको होइन ।

यो त पूर्वको प्रमुख राजमार्ग हो, जहाँबाट हजारौं नागरिक दैनिक आवतजावत गर्थे । अहिले ठप्प छ । तस्बिरमा देखिएको बिरामीलाई चार जना सुरक्षाकर्मीले काँधमा बोकेका छन् । प्रहरी, सशस्त्र प्रहरी र नेपाली सेनाले स्ट्रेचर काँधमा बोकेर बिरामीलाई पहिरो पार गराउँदै छन् ।

यो केवल एक दिनको समस्या हैन २५ दिन यता दैनिकी यसरीनै चलिरहेको छ । पहिरो वारी एउटा एम्बुलेन्स पहिरो पारी अको एम्बुलेन्स रोकिएको छ । विरामीको छटपटि सुरक्षाका काँधमा छ । वैकल्पिक भनीएका सडकमा एम्बुलेन्स गुड्ने अवस्था छैन । अन्य सवारी साधन ज्यानको बाझी थापेर यात्रा गरिरहेका छन । दिनहुँ हिलोमा भासीएर संघर्ष गरीरहेका सवारी साधन कति बेला बाटो मुनी पुग्ने पत्तो छैन ।

राजदुवाली बन्द भएपछि वैकल्पिक बाटोको हालतका कारण सवारी साधन दुर्घटना भइरहेका छन । भाग्य बस अहिले सम्म मानविय क्षति नभएपनि ठूलो क्षति इलामले बेहोरीरहेको छ । ग्यास सकिएको छ, खाद्यान्न ढुवानीमा समस्या छ, इन्धनको अभाव बढेको छ । कोठा भाडामा बसेर पढ्ने विद्यार्थीहरू चुलो बाल्न नसकेर चिन्तित छन् ।

किसानले उत्पादन बजार पु¥याउन पाएका छैनन् । बिरामीले अस्पताल पुग्न सुरक्षाकर्मीको काँध खोज्नुपरेको छ । पानी नपर्दा पिकअपले ग्याँस त ल्याउछ तर एक पटकमा ६५ वटा मात्रै । पानी पर्यो भने त्यो पनि आउँदैन ।

वैकल्पिक भनिएको सिमलगोलाई–तिल्केनी सडक अझै बजेटको प्रतीक्षामा छ । भञ्ज्याङ–बेलासे सडक समयमै सम्पन्न भएको भए आज यो पीडा सायद देख्नुपर्ने थिएन । अधुरा योजना र ढिलो कामको मूल्य अहिले सर्वसाधारणले आफ्नो दैनिकी र जीवनबाट तिरिरहेका छन् । सामाजिक सञ्जालमा अहिले एउटै आवाज सुनिन्छ—‘इलाम टापु बन्यो ।’ यो केवल भावनात्मक अभिव्यक्ति होइन, भोगाइ हो । जनताको दुःख कहिलेसम्म सुरक्षाकर्मीको काँधमा बोकाइरहने ? राज्यले आफ्नो जिम्मेवारी कहिले बोक्ने ?

इलामको यो घटनाले हामी पूर्वाधार निर्माणमा कति जिम्मेवार छौँ ? सडक बनाउनु मात्र पर्याप्त हुँदैन । त्यसको भौगोलिक जोखिमको अध्ययन, ढल निकास, पहिरो नियन्त्रण, वैकल्पिक मार्ग पनि उत्तिकै आवश्यक हुन्छ । नागरीकले अनुभुती गर्ने विकास उद्घाटनका रिबनमा होइन, संकटका थेग्ने आधारमा हुनुपर्छ ।

सम्बन्धित समाचार

मायाघरको नाममा उठेको सहयोग रकम बुझाउन राधिका दासीलाई आग्रह सुनसरीको कप्तानगञ्जमा सुरक्षा निगरानी गर्न काठमाडौंबाट पठाइयो ड्रोन २५ दिन यता मेची राजमार्ग अवरुद्ध एन्डी बर्नहम बेलायतको नयाँ प्रधानमन्त्री नियुक्त श्रीमतीको हत्यापछि श्रीमानले गरे आत्महत्या झापा जिल्ला अदालतबाट ६० प्रतिशत मुद्दा फर्स्योट तत्कालीन मन्त्री, सचिव र नगर प्रमुखसहित ७ जनाविरुद्ध भ्रष्टाचार मुद्दा दायर नागरिकका गुनासा सुन्दै गाउँटोलमा सांसद रानामगर