बेइजिङ । टाइफुन ‘डल्फिन’ कमजोर हुँदै गए पनि पूर्वी चीनमा सोमबार भारी वर्षा जारी रहँदा सयौँ उडान रद्द भएका छन् भने केही क्षेत्रमा सार्वजनिक यातायात सेवा प्रभावित भएको छ।
चीनको राष्ट्रिय मौसम विज्ञान केन्द्र (एनएमसी)का अनुसार ‘डल्फिन’ले आइतबार झेजियाङ प्रान्तको तटमा दुईपटक प्रवेश गरेपछि क्रमशः शक्ति गुमाएको हो। केन्द्रले सोमबार बिहान आँधीसम्बन्धी सबैभन्दा न्यून तहको चेतावनी जारी गरेको छ।
यद्यपि, पूर्वी तथा मध्य चीनका केही क्षेत्रमा सोमबार पनि भारी वर्षा जारी रहने एनएमसीले जनाएको छ। झेजियाङको पूर्वी तथा दक्षिणी क्षेत्रमा अधिकारीहरूले उच्च तहको बाढी चेतावनी जारी गर्दै स्थानीय बासिन्दालाई सतर्क रहन आग्रह गरेका छन्।
भारी वर्षाका कारण साङ्घाईका दुई प्रमुख विमानस्थलबाट हुने ९४३ उडान सोमबार रद्द गरिएको विमानस्थल प्राधिकरणले जनाएको छ। वर्षाले केही स्थानीय रेल सेवासहित सार्वजनिक यातायातमा समेत असर पारेको छ।
झेजियाङको निङ्बो अन्तर्राष्ट्रिय विमानस्थलले स्थानीय समयअनुसार सोमबार दिउँसोदेखि उडान सेवा पुनः सञ्चालन गर्ने जनाएको छ। तर आँधीको प्रभाव पूर्ण रूपमा नहटिसकेकाले केही उडान ढिलो हुन वा पुनः रद्द हुन सक्ने विमानस्थलले चेतावनी दिएको छ।
प्रान्तीय राजधानी हाङझाउमा आइतबार केही रेल सेवा रोकिए पनि सोमबार बिहानदेखि सबवे सेवा पुनः सञ्चालन गरिएको छ।
यसैबीच, उत्तरी चीनमा पनि खराब मौसमको जोखिम बढेको छ। बेइजिङका पाँच जिल्लामा सोमबार भारी वर्षाका लागि उच्च तहको चेतावनी जारी गरिएको छ। अधिकारीहरूले सम्भावित बाढी तथा पहिरोको जोखिमलाई ध्यानमा राख्दै सावधानी अपनाउन आग्रह गरेका छन्।
टाइफुन ‘डल्फिन’का कारण सप्ताहन्तमा चीनभर एक हजारभन्दा बढी उडान रद्द गरिनुका साथै दसौँ हजार मानिसलाई सुरक्षित स्थानमा सारिएको थियो।
यसअघि दक्षिणी ग्वाङडोङ प्रान्तमा दुई साताअघि टाइफुन ‘नोल’ आएको थियो। अधिकारीहरूले उक्त आँधीलाई यस वर्ष चीनमा आएको सबैभन्दा शक्तिशाली आँधीका रूपमा वर्णन गरेका थिए।
गत महिना पनि दक्षिणी तथा मध्य चीनका विभिन्न क्षेत्रमा खराब मौसमले ठूलो क्षति पुर्याएको थियो। ग्वाङ्सी क्षेत्रमा टाइफुन ‘मेसाक’का कारण आएको बाढीमा ३९ जनाको मृत्यु भएको थियो भने मध्य हुबेई प्रान्तमा आएको आँधी र हावाहुरीमा ११ जनाको मृत्यु हुनुका साथै ३३१ जना घाइते भएका थिए।
