काठमाडौं । बाढी, पहिरो, भूकम्पलगायत विपद्का बेला सञ्चार सञ्जाल अवरुद्ध हुँदा खोज तथा उद्धारमा हुने समस्या घटाउन नेपालका सुरक्षा निकायलाई १० करोड रुपैयाँभन्दा बढी मूल्यका सञ्चार उपकरण हस्तान्तरण गरिएको छ ।

हाइटेरा र नेपाली साझेदार अडिडेलले नेपाल प्रहरी र सशस्त्र प्रहरी बललाई बडी–वर्न क्यामेरा, पुश–टु–टक ओभर सेलुलर (पीओसी) रेडियो, ई–प्याक पोर्टेबल रिपिटर तथा तिनसँग सम्बन्धित हार्डवेयर र सफ्टवेयर उपलब्ध गराएका हुन् ।

नियमित सञ्चार सञ्जाल नभएको वा विपद्का कारण नेटवर्क अवरुद्ध भएको क्षेत्रमा ई–प्याक रिपिटरबाट अस्थायी रेडियो सञ्चार स्थापना गर्न वा सञ्चारको पहुँच विस्तार गर्न सकिनेछ । यसले उद्धार तथा सुरक्षा टोलीबीच प्रत्यक्ष सम्पर्क कायम गर्न सहयोग गर्नेछ ।

पीओसी रेडियोले सेलुलर नेटवर्कमार्फत ठूलो क्षेत्रमा समूहगत सञ्चार गर्न तथा प्रयोगकर्ताको स्थानसम्बन्धी जानकारी लिन सकिने व्यवस्था गर्छ । बडी–वर्न क्यामेराले फिल्डमा खटिएका सुरक्षाकर्मीको अडियो तथा भिडियो रेकर्ड गर्नेछ । प्रणालीअनुसार त्यस्तो विवरण नियन्त्रण कक्षमा प्रत्यक्ष पठाउनसमेत सकिने जनाइएको छ ।

उपकरणमार्फत विभिन्न सञ्चार प्रणालीलाई जोडेर केन्द्रीय कमाण्ड तथा नियन्त्रण कक्ष सञ्चालन गर्न सकिने बताइएको छ । विशेषगरी बाढी, पहिरो, भूकम्प र हिमाली क्षेत्रमा उद्धारका क्रममा नियमित सञ्चार माध्यम प्रभावित हुँदा यसको उपयोग हुने जनाइएको छ ।

सहयोगस्वरूप उपलब्ध गराइएकाले उपकरणको वास्तविक मूल्य तथा नेपाल प्रहरी र सशस्त्र प्रहरीलाई छुट्टाछुट्टै वितरण गरिएको परिमाण सार्वजनिक गरिएको छैन । अनुमानित मूल्य भने १० करोड रुपैयाँभन्दा बढी रहेको जनाइएको छ ।

दक्षिण कोरियाको सियोलस्थित हाइटेराका एसिया क्षेत्रीय प्रमुख निङ मा र अडिडेलका अध्यक्ष सञ्जय प्रधानसहितका प्रतिनिधिले संयुक्त रूपमा उपकरण हस्तान्तरण गरेका हुन् ।

सम्बन्धित समाचार

८ करोड ४२ लाख बिगोका १२ बैंकिङ कसुर मुद्दामा फरार प्रतिवादी पक्राउ बाढीबाट मृत्यु भएकाको डिएनए जाँचमा चिनियाँ प्रविधि र वैज्ञानिकको सफलता देवताल गाउँपालिका-३ का वडाध्यक्ष कुशवाहाको निधन घरमा पुरिएका तीनजनाको मृत्यु काठमाडौं जोड्ने मुख्य सडक दिउँसोसम्म खुलाउने लक्ष्य चाडपर्व लक्षित विशेष अभियान सञ्चालन गर्दै ट्राफिक प्रहरी भोटेकोशी बाढीपछिको खोज तथा उद्धार कार्य स्थगन गर्ने सरकारको निर्णय पुल नहुँदा खोला तर्नै सकस, नदीजन्य पदार्थमा करको मार