म्युनिख । जर्मन फुटबल लिग (डीएफएल)ले कोरोना भाइरस (कोभिड–१९)को सम्भावित त्रासका कारण स्थगित भएको जर्मन बुन्डेस लिगाको बाँकी मे तेस्रो साता गराउने निर्णय गरेका छन् ।
डीएफएलले बुन्डेस लिगाको शीर्ष दुई श्रेणीको ३६ क्लबसँगको सहमतिमा यो सिजनको बाँकी रहेको खेलहरू मे तेस्रो सातादेखि ‘क्लोज डोर’मा खेलाउने सहमति गरेको हो । बुन्डेस लिगामा नौ चरणको खेल बाँकी छ । बुन्डेस लिगाको २५औं चरणको खेल सकिदा बायर्न म्युनिख ५५ अंक जोडेर शीर्षस्थानमा रहेको छ । बोरुसिया डर्टमन्ड ५१ अंक जोडेर दोस्रो स्थानमा रहेको छ । बुन्डेस लिगाको प्रायः सबै टोलीले एक साताअघि प्रशिक्षण थालिसकेको छ । टोलीहरूले प्रशिक्षणमा त्यहाँको सरकारको निर्णयलाई ध्यानमा राख्दै सामाजिक दूरी कायम गरी सानो समूह बनाएर प्रशिक्षण गरिरहेको छ ।
डीएफएलको ३० जुनसम्ममा सिजन सकाउने योजना छ । मे १७ या १९ बाट सिजन पुनः सुचारु गर्ने विषयमा अहिले छलफल भइरहेको छ । निर्णय आउन बाँकी छ । डीएफएलले क्लोज डोरमा खेलाउदा २ सय ५० जनाभन्दा बढीलाई मैदान प्रवेशमा रोक लगाउनेछ । जसमा खेलाडी, अफिसियल र लाइभ ब्रोडकास्टका सदस्य रहनेछन् । बुन्डेस लिगा र लिगा २ अप्रिल ३० सम्म स्थगित गरिएको छ । ‘जर्मनीमा मानिसहरू आफ्नो दैनिक जीवनमा फर्किन खोजिरहेका छन् । यसले बुन्डेसलिगा सुरु हुने संकेत गर्छ ।’ बुन्डेस लिगाका प्रमुख कार्यकारी क्रिस्टियन सेफर्टले भने, ‘यो सिजन अन्त्य गर्नु भनेको पाँचवटा क्लबहरू गम्भीर आर्थिक संकटबाट बचाउनु हो । लिग सकाउन सकेको अवस्थामा उनीहरूलाई केही राहत मिल्नेछ ।