बलिउडका स्टारको वास्तविक नाम

मुम्बई । भारतका थुप्रै कलाकारले बलिउडमा पाइला टेकेपछि आफ्नो नाम परिवर्तन गरेका छन् । यसरी आफ्नो नाम परिवर्तन गर्नेहरूमा अभिनेता अमिताभ बच्चनदेखि अजय देवगनसम्म छन् । अभिनेता मात्र होइन, थुप्रै अभिनेत्रीले पनि बलिउडमा पाइला टेकेपछि आफ्नो नाम परिवर्तन गरेका छन् ।

अभिनेता अमिताभ बच्चन फिल्ममा आउनुभन्दा अघिसम्म इन्किलाब श्रीवास्तवका रूपमा परिचित थिए । उनका पिता एवं प्रसिद्ध भारतीय कवि हरिवंश राय बच्चनले अमिताभको नाम इन्किलाब राखेका थिए । कलाकारका रूपमा मुम्बई छिरेपछि उनले आफ्नो नाम अमिताभ राखे । बुबाको टाइटललाई उनले थरका रूपमा बच्चन राखे । यसरी इन्किलाब श्रीवास्तव बलिउड छिरेपछि अमिताभ बच्चन भए ।

अर्का अभिनेता सलमान खानले पनि फिल्ममा प्रवेश गर्ने निधो गरेपछि आफ्नो नाम परिवर्तन गरेका हुन् । बलिउडका सफल फिल्म लेखक तथा निर्माता सलिम खानका छोरा सलमानको वास्तविक नाम अब्दुल रसिद सलिम खान थियो । उनी स्कुले जीवनमा पनि अब्दुलका नामले परिचित थिए । पछि उनले आफ्नो नाम परिवर्तन गरेर सलमान खान राखे । ‘मैने प्यार किया’ फिल्मबाट बलिउडमा नायकका रूपमा डेब्यु गरेका उनी त्यसपछि सलमान खानकै रूपमा लोकप्रिय भए ।

अजय देवगनले पनि फिल्ममा आउने भएपछि आफ्नो नाम परिवर्तन गरेर अजय राखेका हुन् । सन् १९९१ मा ‘फूल और काँटे’मा अभिनय गर्नु अघिसम्म उनी विशाल विरु देवगनका नामले परिचित थिए । उनका कलेजका साथीहरूले अहिले पनि अजयलाई विशालकै रूपमा बोलाउँछन् । तर, फिल्ममा आउने भएपछि उनलाई नयाँ नाम राख्न मन लाग्यो । त्यसैले विशालबाट उनले आफ्नो नाम अजय राखेका हुन् ।

अर्का बलिउड अभिनेता अक्षय कुमारले पनि फिल्ममा आएपछि आफ्नो नाम परिवर्तन गरेका हुन् । फिल्ममा आउनुअघि उनी मार्सल आर्ट खेलाडी र होटलमा सेफ थिए । उनको वास्तविक नाम राजीव हरिओम भाटिया हो । फिल्ममा आएपछि उनी राजीव भाटियाबाट अक्षय कुमार बनेका हुन् ।

एक समय भारतीय राष्ट्रिय क्रिकेट खेलाडीका रूपमा समेत चर्चा कमाएका अभिनेता सैफ अली खानको वास्तविक नाम साजिल अली खान हो । उनी भारतका नवबों राज परिवारका हुन् । उनी बलिउड छिरेपछि साजिदबाट सैफ अली खान भएका हुन् ।

बलिउडका अर्का अभिनेता जोन अब्राहमले पनि बलिउड छिरेपछि यो नाम राखेका हुन् । फिल्ममा आउनुअघि उनी फरहानका रूपमा परिचित थिए । स्कुलदेखि कलेजसम्म फरहान अब्राहमका रूपमा परिचित यी अभिनेताले बलिउड छिरेपछि आफ्नो नाम फरहानबाट जोन अब्राहम राखेका हुन् ।

यस्तै, बलिउडमा मिथुन दाका नामले परिचित अभिनेता मिथुन चक्रवतीको वास्तविक नाम यो होइन । उनी फिल्ममा आउनुभन्दा अघि गौरंगा दादाका रूपमा परिचित थिए । उनको वास्तविक नाम गौरंगा चक्रवर्ती हो । अभिनेताका रूपमा बलिउड छिरेपछि उनले आफ्नो नाम गौरंगाबाट मिथुन चक्रवर्ती राखेका हुन् ।

अर्का अभिनेता सनी देओलले पनि फिल्ममा आएपछि आफ्नो नाम परिवर्तन गरेका हुन् । उनको वास्तविक नाम अजयसिंह देओल हो । उनलाई परिवारमा अहिले पनि सनी नभनेर अजय सिंहको नामले नै बोलाउँछन् । बलिउड छिरेपछि उनी सनीको नामबाट लोकप्रिय भएका हुन् । अर्का अग्रज बलिउड अभिनेता दिलिप कुमारको यो नाम पनि फिल्ममा आएपछि राखिएको हो । फिल्ममा आउनुअघि उनी मोहम्मद युसुफ खानका रूपमा परिचित थिए । यो नाम निकै लामो भएपछि उनले फिल्मी नाम दिलिप कुमार राखेका हुन् ।

बलिउड अभिनेता जस्तै केही अभिनेत्रीहरूले फिल्ममा आएपछि आफ्नो नाम परिवर्तन गरेका छन् । बलिउड अभिनेत्री महिमा चौधरी स्कुलमा ऋतुको नामले परिचित थिइन् । उनी फिल्ममा आएपछि ऋतुबाट महिमा चौधरी भएकी हुन् ।

अर्की अभिनेत्री सनी लियोनीको पनि वास्तविक नाम यो होइन । अमेरिकी पोर्न फिल्म उद्योगमा प्रवेश गर्ने क्रममा उनले आफ्नो नाम परिवर्तन गरेर सनी राखेकी हुन् । उनको वास्तविक नाम करनजित कौर बोहरा हो । पछि पोर्न स्टार भएपछि उनी करनजितबाट सनीको नामबाट लोकप्रिय भइन् । बिग बोसमा काम गर्न भारत आएकी उनी त्यसपछि बलिउडमा नायिकाका रूपमा स्थापित भएकी हुन् ।

अर्की नायिका मल्लिका शेरावतले पनि बलिउड प्रवेससँगै यो नाम राखेकी हुन् । उनी बलिउड प्रवेशभन्दा अघि रिमाको नामले परिचित थिइन् । उनको सुन्दरता देखेर एक जनाले हुस्नोकी मल्लिका भन्ने क्रममा मल्लिकाका रूपमा सम्बोधन गर्न थालियो । त्यो नाम रिमालाई निकै मन प¥यो । उनले आफ्नो नाम बदलेर मल्लिका शेरावत राखेकी हुन् । यस्तै, अर्की अभिनेत्री प्रीति जिन्टाको वास्तविक नाम प्रीतम जिन्टा सिंह हो । यो नाम केटा जस्तो भयो भनेर बलिउड प्रवेशका क्रममा उनी प्रितमबाट प्रीति भएकी हुन् ।

तपाइको प्रतिक्रिया
(Visited 330 times, 1 visits today)

Ads Space Available

epaper

भर्खरै

देउवा-नेपालको भेटले सत्ता समीकरणमा तरंग

कुरी-कुरी

राजधानी राष्ट्रिय दैनिक:कुरी-कुरी – असोज ८, २०८०
राजधानी राष्ट्रिय दैनिक:कुरी-कुरी – असोज ८, २०८०
मालिकामा एमालेविरुद्ध पाँच दलीय गठबन्धन