काठमाडौं । नेपाली चलचित्र ‘आँखा’ ले संयुक्त राज्य अमेरिकामा दुई वटा अन्तर्राष्ट्रिय अवार्ड जितेको छ । जोन योञ्जनद्वारा निर्देशित यो चलचित्रले अमेरिकाको ‘वल्र्ड फेस्ट–ह्युस्टन अन्तर्राष्ट्रिय चलचित्र महोत्सव’मा दुई वटा प्रतिष्ठित ‘रेमी अवार्ड’ जितेको हो ।

गत साता मात्र भत्काइएको थापाथलीमा रहेको सुकुम्वासी बस्तीमा यो चलचित्रको सबै दृश्य छायांकन गरिएको थियो । सुकुम्वासी बस्तीमा जीवनयापन गरिरहेका सामान्य मानिसहरूको कथा, संघर्ष र यथार्थलाई यो चलचित्रमा मार्मिक प्रस्तुत गरिएको थियो ।

सन् १९६१ मा स्थापना भएको ‘वल्र्डफेस्ट–ह्युस्टन अन्तर्राष्ट्रिय चलचित्र महोत्सव’ विश्वकै सबैभन्दा पुरानो स्वतन्त्र चलचित्र महोत्सवमध्ये एक मानिन्छ । यो अन्तर्राष्ट्रिय महोत्सवमा अवार्ड जित्ने पहिलो नेपाली चलचित्र ‘आँखा’ बन्न सफल भएको छ । यस चलचित्रले ‘विदेशी फिचर’ प्रतिस्पर्धामा उत्कृष्ट हुँदै ‘प्लेटिनम रेमी अवार्ड’ र ‘निर्देशन–क्राफ्र्ट’ प्रतिस्पर्धामा ‘गोल्ड अवार्ड’ जितेको छ ।

विश्वभरका चलचित्र निर्माता र सिर्जनाहरूलाई एकै ठाउँमा ल्याउने यो महोत्सव अमेरिकाको टेक्ससस्थित ह्युस्टनमा आयोजना भएको हो । स्टिभन स्पिलबर्ग, जर्ज लुकास, डेभिड लिन्च र आङ ली जस्ता दिग्गज हलिउड निर्देशकहरूले पनि आफ्नो करियरको सुरुवातमा यही महोत्सवबाट ‘रेमी अवार्ड’ प्राप्त गरेका थिए । यस्तो विश्व प्रसिद्ध मञ्चमा चलचित्र र निर्देशकमा ’प्लेटिनम’ र ’गोल्ड’ जस्ता सर्वोच्च अवार्ड जित्नुले नेपाली चलचित्र उद्योगका लागि खुसीको खबर भएको निर्देशक जोनले बताएका छन् । यो सफलताले विश्वव्यापी प्लेटफर्ममा नेपाली चलचित्र पनि अब्बल बन्ने सकेको पनि निर्देशक जोनले बताए ।

यस अघि ६२औँ संस्करणको एसिया प्यासिफिक चलचित्र महोत्सवमा आफ्नो चलचित्रले ‘उत्कृष्ट चलचित्र’को उपाधि जितेको पनि यी निर्देशकले जानकारी गराए । एसिया प्यासिफिक चलचित्र महोत्सवको सर्वोच्च सम्मान प्राप्त गर्ने पहिलो नेपाली चलचित्र पनि ‘आँखा’ नै हो।

एसियामा ऐतिहासिक जित र अमेरिकामा प्रतिष्ठित दुई रेमी अवार्डको प्राप्तिसँगै, ‘आँखा’ विश्वका थुप्रै अन्तर्राष्ट्रिय महोत्सवमा छानिएको पनि यस चलचित्रका निर्देशकले बताएका छन् । यसले प्राप्त गरिरहेको यि अन्तर्राष्ट्रिय मान्यताले ‘नेपाली कथाहरूले विश्वव्यापी दर्शकहरूको मन छुन सक्छन्’ भन्ने कुरा पुष्टि गरेको निर्देशक जोनले बताएका छन् ।

गत वर्ष रिलिज भएको यो चलचित्रले नेपालमा व्यावसायिक सफलता हासिल गर्न नसके पनि चलचित्र समीक्षकहरूबाट राम्रो प्रतिक्रिया पाएको थियो । चलचित्र ‘आँखा’मा विजय बराल, बुद्धि तामाङ, स्मिता लामिछाने, पशुपति राई, निशा अधिकारी, आरके मेहतालगायतका कलाकारहरूको अभिनय रहेको छ ।

सम्बन्धित समाचार

कर्णालीका चलचित्रकर्मीले सिके छायांकन र लेखन दर्जनौं हिट म्युजिक भिडियो र फिल्ममार्फत उदाउँदै श्याम चलचित्र ‘लालीबजार’को प्रदर्शनमा अदालतको रोक ‘मिरा क्यान्सर समाज’ स्थापना ‘झिँगेदाउ २’ संविधान दिवसमा आउने निताले २२ दिनमा सकिन् ‘पार्वती’ ‘लालीबजार’ रोकेपछि चलचित्रकर्मीहरू धर्नामा उत्रिए झनै बढ्यो ‘बाटुलो जुन’ वितरण विवाद