जनकपुर । प्रदेश २ का प्रदेश प्रमुख राजेश झाले सर्वसाधरणलाई मास्क वितरण गरेका छन् । कोरोना माहामारीको दोस्रो लहर सुरु भएपछि जनकपुरधाममा प्रदेश प्रमुख झाले बाटो एवं पसलमा भेटिएका जोसुकैलाई मास्क वितरण गरेका छन् ।
प्रदेश २ का सबै जिल्ला कोरोना संक्रमणबाजट प्रभावित रहेको बेला प्रदेश प्रमुख झा बजार अनुगमन गर्दै मास्क वितरण गर्दै संक्रमणबाट सचेत रहन आग्रह समेत गर्दैछन् ।
मास्क लगाए नलगाएको अनुगमन गर्नका लागि प्रदेश प्रमुख झाले जनकपुरधाम बजारको अनुगमन गरेको प्रदेश प्रमुख कार्यालयका सचिव ध्रुव गैडेले जानकारी दिए ।
उनले जनकपुरधामस्थित मिल्स एरियाबाट शिव चोकसम्म पैदलै हिँडेर बजारमा रहेका सर्वसाधरणलाई मास्क वितरण गरेका थिए ।
कोरोना महामारीबाट प्रदेश २ को धनुषा अति प्रभावित क्षेत्रमा परेकाले सबैलाई यस महामारीबाट सचेत रहन र अरुलाई सुरक्षित रहने सन्देश दिनका लागि प्रदेश प्रमुख आफैले मास्क बाँडेको र अरुलाई पनि मास्क लगाउनका लागि अभिप्रेरित गरेको सचिव गैडेको भनाई थियो । प्रदेश प्रमुख झाले भेटिएका स्थानियलाइ नियमित हात धुन र मास्क लगाउन अाग्रह गरेका थिए ।
