गुल्मी । मदन भण्डारी राजमार्गअन्तरगत गुल्मी खण्डमा झाडी सफाई नहुँदा दुर्घटनाको जोखिम बढेको छ । जिल्लाको सदरमुकाम तम्घासदेखि सिमटारीसम्म पर्ने पक्की सडकको झाडी सफाई नहुँदा जोखिम बढेको हो ।

अहिले सडकको छेउकुनामा घाँस एवं रुख, बिरुवा उम्रने, पातपतिङ्गर ढलमा गई जम्मा हुने लगायतका समस्या देखिएका छन् । जसको कारण बर्षायाममा पानी नालीबाट नभई सडकबाटै बग्दा सडकको बीचबीचमा खाल्डा परेका छन् । त्यसैगरी बर्षायाममा गएको पहिरो समेत सफा नगर्दा सडक साघुँरिदैँ गएको छ ।

८७ करोड ९१ लाखको सडक
तम्घासदेखि सिमलटारीसम्म पाँच मिटर चौडाईको २८ किलोमिटर सडक छ बर्षअगाडी २०७६ सालमा पक्की गरिएको थियो । कुल ८७ करोड ९१ लाख रकममा निर्माण गरिएको सडकबाट पुर्कोट दह, प्युठान लगायतका ठाउँसम्म पुग्न सकिन्छ । तर सडकको छेउ–कुनाबाट घाँसपात एवं पातपतिङ्गरले ढाक्दा सडकको सौन्दर्य नै मेटिन थालेको छ ।

‘दोहोरो गाडी चल्ने सडक हो, तर अहिले एकोहोरो मात्रै चल्छ ।’ इस्मा गाउँपालिका–६ का सुजन विष्टले भने, ‘दुर्घटनाको जोखिम बढ्दै गएको छ ।’ साथै उनले बर्षायाममा गएको पहिरो नहटाउँदा पनि सडक साँघुरिएको बताए । सडकको केही भागमा माथिबाट आएको पहिरोले साँघुरो भएपनि सम्बन्धित निकायले ध्यान नदिएको उनले बताए ।

धुर्कोट गाउँपालिका–५ का गणेश पाण्डेले सडकमा गएको पहिरो र छेउछेउमा उम्रिएका घाँसपात हटाई सडक सफा गर्न आग्रह गरे । ‘नालीमा झाडी, जोखिममा गाडी छ ।’ उनले भने ।

सोही राजमार्गमा सवारी व्यवसाय संचालन गरेका चालक राजु खत्रीले सडकमा भएको लाहापरवाहीले गर्दा तोकेको समयमा यात्रुलाई सम्बन्धित गन्तव्यमा पु¥याउन नसकिएको गुनासो गरे । उम्रिएका घाँसपात सफा नगर्नु, बर्षायाममा गएको पहिरो नहटाउनु, सडकको बीचमा परेका खाल्डाखुल्डीको व्यवस्थापन नगर्नु जस्ता कारणले यात्रु र सवारी धनी दुवैलाई असर गरेको बताए । विशेषगरी बिरामीहरुलाई समयमै अस्पताल पु¥याउनुपर्नेमा कहिलेकाँही सडक साँघुरो भएको कारण बाधा भएको उनको भनाई छ । साथै सडकमा खाल्डाखुल्डी भएको कारण सवारीमा पनि समस्या देखिने गरेको उनले बताए ।

तम्घासदेखि सिमलटारीसम्म २८ किलोमिटरमा रेसुङ्गा नगरपालिका, धुर्कोट गाउँपालिका, इस्मा गाउँपालिका र मालिका गाउँपालिका पर्दछन् । सडकमा उक्त पालिकाका साथसाथै मदाने गाउँपालिका एवं ढोरपाटन हुदैँ प्युठानसम्मका दैनिक सयौँका संख्यामा सवारी र हजारौको संख्यामा नागरिकले यात्रा गर्छन् ।

सडकको स्वामित्व पाएको मदन भण्डारी राजमार्ग, गुल्मीले उक्त सडकमा दुईजना कामदार खटाएपनि पर्याप्त छैन । उनीहरुले सडकको निश्चित खण्डमा काम गरेपनि सबै सडकमा सक्ने स्थिति छैन । कार्यालय प्रमुख रमेश चौधरीले सडकको निश्चित खण्डहरुमा ठेक्कामार्फत काम हुने बताए । अहिले निश्चित ठाउँमा मात्रै कामदारले झाडी सफाई गरेपनि अन्य ठाउँमा पनि सकेसम्म छिटो झाडी सफाईको काम सक्नेगरी योजना बनाएको उनले बताए ।

सम्बन्धित समाचार

सल्यानमा अवैध रुपमा संचालनमा रहेका ४ वटा जीप प्रहरी नियन्त्रणमा मनाइयो २५८ औं सिन्धुलीगढी विजय उत्सव पुनर्निमाण गरियो डोटेली राजाको प्राचीन दरबार अजयमेरुकोट भ्रष्टाचारका अखडा बन्दै सामुदायिक विद्यालय पद्मकन्या कलेजको क्यान्टिनमा महानगरको छापा सर्वोच्च अदालतको अवहेलना मुद्दा दुई सातापछि दर्ता नेपालगन्ज म्याराथन विजेतालाई २ लाख रुपैयाँ कोशी एक्सिलेंस अवार्ड–२०२६: तीन नयाँ विधासहित तयारी सुरु