सुन्दरहरैचा(मोरङ) । सुनसरीको इटहरीस्थित धरान लाइनमा रहेको पूर्वाञ्चल बेकरी क्याफेमा बुधबार बिहान भएको आगलागी करिब एक घण्टापछि नियन्त्रणमा आएको छ। बिहान करिब १० बजेतिर क्याफेको भान्साबाट सुरु भएको आगो सुरक्षाकर्मी, स्थानीयवासी तथा छिमेकी पालिकाबाट आएका दमकलको संयुक्त प्रयासमा निभाइएको हो।

आगलागी भएको स्थान भीडभाडयुक्त क्षेत्र भएकाले सुरुमा त्रास फैलिएको थियो। स्थानीयहरू आफैं पानी तथा उपलब्ध साधन प्रयोग गरेर आगो नियन्त्रणको प्रयासमा जुटेका थिए भने पछि प्रहरी र दमकल टोली घटनास्थलमा पुगेका थिए।

प्रहरीका अनुसार आगलागीको यकिन कारण खुल्न बाँकी छ भने क्षतिको विस्तृत विवरण पनि संकलनकै क्रममा रहेको छ। प्रारम्भिक अनुमानमा विद्युत् सर्ट वा ग्याससम्बन्धी समस्याका कारण आगलागी भएको हुनसक्ने आशंका गरिएको छ, तर आधिकारिक पुष्टि भने भइसकेको छैन।

आगो नियन्त्रणका लागि सुन्दरहरैचा,बिराटनगर,धरान, इनरुवा र रामधुनी नगरपालिकाबाट दमकल झिकाइएको थियो। तर, घटनाले इटहरीको आफ्नै तयारीमाथि गम्भीर प्रश्न उठाएको छ।

दमकल अभावको पीडा
इटहरी उपमहानगरपालिकाका आफ्नै दुईवटा दमकल भने अहिले प्रयोगविहीन अवस्थामा छन्। केही समयअघि भएको तथाकथित “जेन–जी आन्दोलन” का क्रममा ती दमकलमा आगजनी गरिँदा पूर्ण रूपमा नष्ट भएका थिए। त्यसयता नयाँ दमकल व्यवस्थापन हुन नसक्दा इटहरी अहिले आपतकालीन सेवामा कमजोर बनेको छ।

स्थानीयवासीहरूले यस अवस्थाप्रति असन्तुष्टि जनाउँदै आएका छन्। “आगो लाग्दा आफ्नो नगरको दमकल नै छैन, छिमेकी नगर गुहार्नुपर्छ, यो निकै दुःखद कुरा हो,” एक स्थानीयले भने।

आन्दोलनको असर अझै कायम
“जेन–जी आन्दोलन” का क्रममा भएको सार्वजनिक सम्पत्तिको क्षतिले दीर्घकालीन असर पारिरहेको यो घटनाले देखाएको छ। तत्कालीन आवेगमा गरिएको आगजनीले अहिले सर्वसाधारणकै सुरक्षामा जोखिम बढाएको छ। दमकल जस्तो संवेदनशील पूर्वाधार नष्ट हुँदा त्यसको पुनःस्थापना ढिला हुनु र त्यसबीचमा यस्ता घटना दोहोरिनु गम्भीर चिन्ताको विषय बनेको छ।

समाधानको माग
स्थानीय तथा सरोकारवालाहरूले तत्काल दमकल व्यवस्थापन गर्न र आपतकालीन सेवा सुदृढ बनाउन इटहरी उपमहानगरपालिकासँग माग गरेका छन्। “अब पनि ढिला गरियो भने ठूलो क्षति हुन सक्छ,” उनीहरूको चेतावनी छ। यस घटनाले केवल एउटा क्याफेको आगलागी मात्र होइन, सिंगो शहरको आपतकालीन तयारी, व्यवस्थापन र जिम्मेवारीमाथि प्रश्न उठाएको छ।

सम्बन्धित समाचार

नेसनल प्याब्सन कोशी अध्यक्षमा कमल खनाल सर्वसम्मत चयन सङ्खुवासभाको मकालुबाट सुत्केरीको हेलिकप्टरमार्फत उद्दार धनकुटामा निर्वाचन प्रहरीलाई उद्यमसिलता तालिम हत्या अभियोगमा विक पक्राउ सहयोगी मनहरूको पहलमा सुन्दरहरैंचाका शारीरिक अशक्तलाई आफ्नै घर खोटाङ हेलिकप्टर दुर्घटनाका घाइतेलाई उपचारका लागि काठमाडौं ल्याइयो इलामको पाथीभरा मन्दिरमा ३ वर्षमा ८ तोला सुन, साडे ४ करोड भेटी उदयपुरमा स्कुल बसले विद्यार्थीको ज्यान लियो