काठमाडौं । सरकारले चालु आर्थिक वर्षको बजेटमार्फत घोषणा गरेको ‘करदाता प्रोत्साहन उपहार कार्यक्रम’ औपचारिक रूपमा सुरु गरेको छ । अर्थ मन्त्रालयमा शुक्रबार आयोजित विशेष कार्यक्रममा साउन महिनाको पहिलो १५ दिनका विजेताको घोषणा गर्दै कार्यक्रमको शुभारम्भ गरिएको हो ।

वस्तु तथा सेवा खरिद–विक्रीमा बिल बिजक लिने–दिने संस्कारलाई प्रोत्साहन गर्दै अर्थतन्त्रलाई औपचारिकीकरण र पारदर्शी बनाउने उद्देश्यले यो कार्यक्रम सञ्चालनमा ल्याइएको सरकारले जनाएको छ। मूल्य अभिवृद्धि कर (भ्याट) लाई दिगो राजस्व स्रोतका रूपमा विकास गर्ने लक्ष्यअनुसार कार्यक्रम लागू गरिएको हो ।

आन्तरिक राजस्व विभागका अनुसार २०८३ साउन १ देखि १५ गतेसम्मको अवधिका लागि १६ जना विजेता छनोट भएका छन् । यसमा प्रत्येक दिनका एक–एक जना गरी १५ दैनिक विजेता र एक जना बम्पर विजेता रहेका छन् । दैनिक विजेताले १ लाख १२ हजार ३७४ रुपैयाँ तथा बम्पर विजेताले १० लाख रुपैयाँ पुरस्कार प्राप्त गर्नेछन् ।

विभागका महानिर्देशक डा. भीष्मकुमार भुसालका अनुसार विजेताको छनोट ‘क्रिप्टोग्राफिकली सेक्युर्ड युनिफर्म ¥यान्डम स्याम्पलिङ’ प्रविधिमार्फत गरिएको हो । पूर्ण रूपमा कम्प्युटर प्रणालीबाट हुने छनोट प्रक्रियामा कुनै मानवीय हस्तक्षेप वा विभेद नहुने भएकाले प्रक्रिया निष्पक्ष रहेको उनले बताए ।

विभागका अनुसार साउन १ देखि १५ गतेसम्म उपभोक्ताले विभागको वेबसाइटमा ७ हजार ७७ वटा नगद कारोबार विवरण प्रविष्ट गरेका छन्, जसको कुल मूल्य ८ करोड २४ लाख रुपैयाँ रहेको छ । ती कारोबारमा ३ हजार ९ सय १५ विक्रेता आबद्ध छन् ।

यस्तै, सोही अवधिमा अनलाइन भुक्तानीमार्फत ७६ अर्ब ६० करोड ३ लाख रुपैयाँबराबरको कारोबार भएको विभागले जनाएको छ । अनलाइन भुक्तानीका कारोबार भने स्वतः प्रणालीमा समावेश हुने भएकाले छुट्टै विवरण प्रविष्ट गर्नुपर्ने व्यवस्था छैन ।

विभागले विजेताको कुपन नम्बर र संक्षिप्त विवरण आफ्नो वेबसाइटमा सार्वजनिक गर्ने जनाएको छ । व्यक्तिगत गोपनीयतालाई ध्यानमा राख्दै विजेताको पूरा नाम र मोबाइल नम्बर भने सार्वजनिक नगरिनेछ । पुरस्कार विजेताले १५ दिनभित्र नजिकको आन्तरिक राजस्व कार्यालयमा गई पुरस्कार रकम दाबी गर्न सक्ने व्यवस्था गरिएको छ ।

यसैबीच, पहिलो १५ दिनको १० लाख रुपैयाँको बम्पर पुरस्कार शिव कृष्ण जनरल स्टोरबाट २५० रुपैयाँको सामान खरिद गरेका एक उपभोक्ताले जितेका छन् । सरकारले बिलिङ संस्कारलाई प्रवद्र्धन गर्दै कर प्रणालीप्रति उपभोक्ताको सहभागिता बढाउने उद्देश्यले यस्तो प्रोत्साहन कार्यक्रम सञ्चालनमा ल्याएको जनाएको छ ।

सम्बन्धित समाचार

एक वर्षमा मिटरब्याज सम्बन्धी २८७ वटा उजुरी असार मसान्तसम्म खपत भएको बिजुलीमा भ्याट नलाग्ने सरकारी खर्च नियन्त्रणमा महालेखा कठोर नेप्सेको सीईओ खुला प्रतिस्पर्धाबाट गर्न आवेदन माग करदाता प्रोत्साहन पोर्टल सञ्चालनमा, नगदमा कारोबार गरेका उपभोक्तालाई बिल दर्ता गराउन आह्वान सुनचाँदीको मूल्य घट्यो, कतिमा भइराखेको छ आज कारोबार ? नेपाल राष्ट्र बैंकका कार्यकारी निर्देशकहरुसँगको छलफलमा के भने अर्थमन्त्री डा. स्वर्णिम वाग्लेले ? आत्मनिर्भर बन्ने बाटोमा इलामका महिला